أنت من الفلول يا علي ...

كاريكاتير مضحك وصلني من صديق فنشرته على صفحتى الخاصة على فيسبوك مع تحفظي على بعض ما جاء به لأيديولجيات فكرية تخصني وأن وجدت به ما يعبر عن رأي الكثيرين ممن أقابلهم بالشارع المصري وأتعامل معهم كل يوم ...

لم أتوقع ابداً أن يثير كل هذا الجدل والنقاش العنيف وأن يحظى ب127 تعليق في ساعة واحدة ... و المذهل في الموضوع أن النقاش الحاد كان بين أصدقاء كلهم من النابهين أصحاب التعليم المتميز والمناصب المرموقة و لهم أراؤهم المحترمة ... هو فقط مجرد كاريكاتير لا أكثر ولا أقل !! ... لاقى أستحساناً من بعض الصدقاء فضحكوا والبعض علق قائلاً "أنتي مجرمة" كأني قد اصبت وتراً حساساً أو ربما أشفاقاً عليً مما سأواجهه كالعادة كلما خرجت عن الأطار العام لتقديس "الثورة" أو غردت خارج السرب لأطرح رأياً مختلفاً أو وجهة نظر مغايرة و ربما مستفزة ولكنها موجودة ولا يمكن أغفالها ..

هاجمني أحد أصدقائي و هو شخصية مرموقة نابهة من المتفوقين علمياً و أدبياً و ثقافياً قائلاً :

مين ال83 مليون اللي صوتوا في الأنتخابات الأخيرة دول ... هنستهبل ؟

فكان ردي : ماشوفتش كلمة انتخابات يا صديقي .. أقرأها تاني ..

صديقي : "أحنا اللي خرجنا و صوتنا في الأنتخابات الأخيرة" تالت سطر

وجيش إيه برضه اللي أكبر من الناس؟ الجيش ده مدرسة الكذب والتدليس والرشوة وإذلال أولاد الناس

أنا: آه أوكي يمكن يقصد الأستفتاء ...

ما تخادهاش على أعصابك ده مجرد كاريكاتير بيستخدم رجل الكنبة ... عادي يعني فيه ناس بتُستفَز من لطوف اللي بيرسم جيش بلدها كلاب ...

صديقي : ماباخدش حاجة على أعصابي، بس ما ينفعش ينتقدوا ناس علشان بتدعي تمثيل الشعب كله وبعدين يدعوا هم تمثيل الشعب كله. This discredits the argument

وبعدين مش فاهم نغمة تقديس الجيش المفاجأة دي، كأننا مش عارفين إزاي الناس بتكره عيشتها على سنين التجنيد الإجباري وقد إيه بيشتكوا من الضباط وطرقهم الواطية

أنا : ‎1-أولا عشان تنشر كاريكاتير مش لازم تكون موافق على كل كلمة وحرف فيه ممكن يكون العكس

2-حاليا كل 3 انفار بيدًعوا تمثيل الشعب طيب نسيب الشعب يختار في الأنتخابات الجاية يمكن على غشوميته يختار اختيار كويس أو يعمل توليفة معقولة ماهو مش هيتعلم الديمقراطية اللي اتحرم منها 60 سنة من أول مرة انتخابات

3-أنا كليبرالي علماني عايزة مصر تبقى ألمانيا بكرة وفيها جمهورية برلمانية وحكومة صغيرة لا تتدخل الا في تطبيق القانون على الكل سواسية لكن الوضع عالأرض مختلف .. فيه مجموعات فوضوية متطرفة عايزة تحل الجيش والشرطة وكل مؤسسات الدولة وتبتدي حرب أهلية يموت فيها نص الشعب عشان تحكم وترتب هي لنفسها مجتمع الحياة فوق الأشجار ... و فيه مجموعات ماركسية متطرفة عايزة حالة فلويديتي أو سيولة في البلد على طول عشان تقلبها ثورة بلشفية ... دماغهم وقفت عند أواخر القرن ال19 وأوائل القرن ال20 ... وفيه مجموعات فاشية طالبانية عايزة تسيطر في غفلة من الزمن وتغير وش مصر الى الأبد

4- الحل أيه طيب ؟؟؟ التنظير مابيجيبش همه ... أعمل انتخابات وادي الشعب ضمانات أنه لو أخطأ ففيه رجعة ممكن يصلح غلطته

5-شئنا أم أبينا الناس اللي عاشت ال8 شهور اللي فاتوا جوة مصر لا تجد من تثق به سوى الجيش ... ارحموهم بقى ... لما تحلولهم الجيش عايزينهم يعملوا أيه وهم لا يثقوا في كل الأشكال الموجودة على الساحة ؟

6-دولة بحجم مصر والفساد المستشري فيها لا يمكن أن تزيد سرعة الهدم عن سرعة البناء والا تنهار الدولة ... عاوز تهدها ؟ هدًها ... هتتحمل المسئولية ساعتها ؟ طبعا لأ طب هتودي القرب 100 مليون روح فين على ما تهدها وتبنيها !!

7-النظريات والمباديء هايلة ولا تجزأ لكن البراجماتية السياسية على أرض الواقع أمر آخر ... مصر دولة مُجرًفة من الفكر والتعليم والصحة .... البركة في آخر 30سنة اتجابت أرض ... نحلها ازاي ؟

8-محدش عايز حكم عسكر تاني مش هنعيده من الأول لكن ننتقل للحكم المدني ازاي ؟؟ نهد كل مؤسسات الدولة ونعيش باللجان الشعبية ؟ محدش يقدر يعيش كده واللي يحب بلده مايرضالهاش الخراب كده

9-التجنيد الأجباري خطأ و خطر على الجيش نفسه خاصة لما بيجند ناس ضد أرادتها أو عناصر كارهة بلدها ومستعدة تحارب ضدها ... خطأ لابد من تصحيحه في القريب العاجل لكن أمكانيات الدولة الأستهلاكية اللي محدش عايز يشتغل فيها عايز يقبض بس مش جايبة غير تجنيد أجباري حاليا نعمل أيه ؟ نجيب دولة تحتلنا ونخلص ؟

10-البناء لازم يبتدي من تحت والشعب لم يثور على أخطاؤه ولا فساده كان المفروض من القوى الثورية تجرجر رجله معاها مش تتنٍك عاللي جابوه وتطلع دينه أكتر ماهو طالع .... صراحة ... القوى الثورية اللي عندنا لا تستحق الثورة دي أصلا والشعب من 19مارس نزع عنها الشرعية وأداها على أفاها والأنتخابات الجاية هيشوطها تماما

11-حرية الرأي والتعبير يا ممنوعة عن الجميع يا مكفولة للجميع ... من غير تصنيف وليبلينج وكنبة وعبيد وفلول واللي يصنف الناس لا يستحق لا الأحترام ولا الأستماع ليه أصلاً

12-رأي صواب يحتمل الخطأ ورأي غيري خطأ يحتمل الصواب .....

صديقي : هو أنا قلت إنك موافقة على كل كلمة فيه؟ أنا باناقش اللي فيه، ولا ممنوع؟

أنا : طب ما أنا بأناقشك أنا كمان !! هو أنت ماقريتش غير السطر ده :)))))

صديقي : لا ما عنديش اعتراض على الباقي، إنتِ اللي معترضة على كلامي

أنا : ولا حصل .... هاعترض على كلامك ليه !!

صديقي : الحجج بتاعت حزب الكنبة والشعب وكل الكلام ده حجج ما لهاش أي معنى. الثورة شكل من أشكال التعبير ومش بتحصل كل يوم وعمر ما بيشترك فيها أكثر من ١-٢٪ من الشعوب. وواضح إن فيه مجهودات ضارية من عدة جهات إما لاختطاف الثورة أو لإحباطها أو إجهاضها، وأهم وسيلة بيلعب بيها المجهضون هي قول إن الشعب لا يؤيد الثوار، ومن كتر تكرار الكلام ده بيقنعوا أغلبية الناس فعلاً إن الثورة هي السبب في كل المشاكل-- أما المختطفون فبيدعوا إن الشعب معاهم. أنا شايف بقى إن اللي رسم الكاريكاتير ده غالباً إما مختطف أو مجهض أو عميل لهذا أو ذاك.

أنا : أنت بترمي حزمة تهم على اللي عمل الكاريكاتير من غير ما تفكر ولو للحظة أن ده ممكن يكون رأيه عن قناعة شخصية وبدون أي غرض غير المصلحة العامة ولا بيقبض ولا بينتفع .... اتهامات العمالة والأجندات والتخوين والتغييب رفضها التحريريين في الأول وحاليا بيستخدموها مع الناس بنفس وضاعتها وبدون تمييز .... كلامك كده يا صديقي فيه تأسيس لمحاكم تفتيش مكارثية خطر على المصريين كلهم .....

صديقي : ما هو ده رأي أمي وناس تانية كتير، بس أنا باتكلم على اللي رسم ده بقى من خبرتي الشخصية، والأيام بيننا

أنا : الله .... يعني طلع الكاريكاتير بيعبر عن ناس من الشعب أهوه !!

وبعدين بتتوعدني أنا ليه مش فاهمة ؟ أيه الأيام بيننا هنشوف صاحب الكاريكاتير بيتسحل في الشارع على ايد التحريريين ولا أيه !!

أنعم وأكرم بدي ديمقراطية يا سيدي ....

ليتدخل صديق ىخر في الحوار للمفارقة هو من نفس تخصص صديقنا الأول و نفس دفعته و على نفس الدرجة العلمية و الخلقية و الأجتماعية الرفيعة ويرد قائلاً :

التجنيد الأجباري ماتعملش علشان يكون مريح وخمس نجوم لانه بيطلع رجالة ويفهم ده الي دخل الجيش و طبيعي ان الناس تحاول تزوًغ منه زي كل حتة في الدنيا محناش عجبة . أما الفساد فموجود بشكل عام بس ما ننكرش انه في اقل صوره في الجيش و علي الاقل ماأداش لأنهيار منطومة الجيش زي كل حاجة تانية. الدفاع عن الجيش مش لأنهم ملايكة منزلين ولكن لأنهم المسمار الأخير الي ما ينفعش نفكه. واللي اتعامل مع ضباط الجيش خصوصا أيام الثورة يقدر يفهم انهم من الناس و فاهمين انهم بيخدموا الناس مش زي ضباط الداخلية.

الموجودين دلوقتي ميهمهومش مصلحة البلد و مايجوش 0.5% من 80 مليون. لما نفهم الأول المليار دولار الي دخلت مصر من أمريكا و السعودية وايران دخلوا ليه وحايتعمل بيهم ايه ساعتها ممكن نفهم مين الي عايز مصلحة البلد. الثورة علشان تنجح لازم تبقي البلد احسن واللي بيحصل دلوقتي خناقة علي الكراسي و لكشة لفلوس الدفعة الجديدة انا كنت في التحرير من فبراير و متاكد ان الناس غير الناس

أنا : ابحث عن اللي بيموٍل الأولتراس من كام سنة وأنت تفهم أشياء كثيرة جداً يا عزيزي ...

ليعود صديقي الأول ويرد : طيب والمليارات اللي بتروح للجيش هدفها إيه ؟

مش كل اللي كانوا في فبراير هم اللي في سبتمبر، بس الناس اللي أنا أعرفهم مرابطين من يوم ٢٥ لسة بيروحوا التحرير وقت اللزوم (مش روكسي ومش الجيزة طبعاً)

أنا : لهو أنت مش واخد بالك أن ده جيش نظامي ... جيش جمهورية مصر العربية ... جيش بلدك يعني .... تعويض عن دم ال100ألف ++ شهيد اللي سينا شربت دمهم لما ارتوت وتمن السلام مع اسرائيل .... أيه يا صديقي انت مش عايز مصر يبقى لها جيش نظامي !! عايزها ميليشيات !! وترجع تقول الناس لا تثق في التحريريين ليه !! ... طب يا ترى في أمريكا تقدر تستغنى عن 911 ولا تقدر تطلب حل الجيش الأمريكي !؟ ... مش فاهمة أنا قوة الجيش المصري ممكن تضايق المصريين في أيه !؟ بجد شيء عجيب وفزورة محتاج تتحل

خللي التحرير اللي مرابطين فيه يا صديقي .... احنا نسينا التحرير وعايشين من غيره ومش فارق معانا كتير .... ماعلينا ....

صديقي الثاني يرد : و بالمناسبة الي بيموتوا دلوقتي في سينا و محدش يعرف عنهم حاجة من الجيش علشان بينضفوها من الجماعات و البلاوي الي معششة فيها و عايزة تفصلها عن مصر ما راحوش علشان هما فاسدين او بيسترزقوا. واللي قاعدين في التحرير دلوقتي مافيش فيهم دكر يقدر يشيل سلاح و يروح ينضف ارضه لانهم مش هما الي نزلوا في يناير

صديقي الأول يرد : أمريكا ما بتديش مليارات علشان مصر يبقى عندها جيش نظامي. أمريكا بتدي مليارات للجيش علشان مصلحتها وبتدي مئات آلاف لجمعيات حقوق الإنسان علشان مصلحتها برضه. السعودية بتمول اللي بتمولهم علشان مصلحتها وعلشان مصلحة أمريكا بشكل غير مباشر. إيران بتنافس أمريكا والسعودية، وهكذا. كل واحد بيمول علشان مصلحته ... اللي نزلوا في ٢٥ يناير بينزلوا دلوقتي برضه، لكن فيه ناس تانية كتير نزلت بشكل انفعالي غضباً من مبارك والعادلي بالذات ودول بالنسبة لهم الموضوع انتهى، وفيه ناسل تالتة نزلت علشان تسترزق ولما استرزقوا بطلوا ينزلوا، وهكذا. الصراع على الحكم وعلى المصالح الشخصية وعلى مصلحة مصر صراع كبير، لكن المشكلة في تعريف مصلحة مصر بالنسبة للقليلين المخلصين فعلاً لمصلحة مصر (ومنهم ناس في المجلس العسكري وفي المخابرات طبعاً بس دول مصلحة مصر بالنسبة لهم ما حدش غيرهم يعرفها وبالتالي هيخربوها ويقعدوا على تلها).

واللي شايف إن مطالبه ما اتحققتش من حقه ينزل يطالب بيها لغاية لما يبقى فيه شكل ديمقراطي للتعبير. إحنا ما عندناش مجالس نيابية ومعظم الصحف مضروبة. طريقة التعبير الوحيدة حالياً هي نزول الشارع أو العمل الحزبي، وده اللي بيحصل فعلاً بكل ما فيه من مزيج معتاد من الفساد والنقاء.

أنا : أمريكا حاولت تغير عقيدة الجيش المصري أيام السادات فرفض وأيام مبارك بعد حرب العراق عشان تحوله لجيش مكافح للأرهاب ... حسني قبل وطنطاوي رفض ... كلامك عن التمويل معناه أن كلام الجيش صح وكلام الحكومة صح كل الممَولين في مصر من كل الأتجاهات نصابين ومخربين وأرزقية ... لا يمكن تقارن معونات لجيش نظامي بجمعيات بتقبض عشان تخرب بلدها

عموما برضه خللي اللي في التحرير مرابطين الى الأبد ... الشعب له كلمته واختياره والراجل مايرجعش يعيط في الآخر لما الشعب يشوطه ...

صديقي الثاني : أنا ما بتكلمش علي المليارات دي أنا بتكلم علي 180 مليون الي اتوزعوا علي NGOs واللي رجعت الخارجية الأمريكية اعتذرت عن عدم ابلاغ الحكومة بيهم. و دول خدوهم ائتلافات و جمعيات الثورة ليييييه

انا عارف ان الناس عايزة تغير بس لو بصيت للصورة من بعيد حتفهم الفكرة العبقرية لهدم البلد. مثلا اي بنك مايقدرش يستحمل ان كل الناس الي حاطة فلوس تسحبها مرة واحدة وكمان البلد ماتقدرش تدي كل الناس كل حاجة خصوصا ان احنا معندناش اقتصاد. يبقي لو افتعلت اعتصمات واضربات في كل حتة مرة واحدة يبقي عايز تهد البلد

صديقي الأول : ما هو اللي وزع الـ١٨٠ مليون هو اللي بيمول الجيش المصري برضه.

ليتدخل صديق ثالث في احتدام الجدل وله مكانة مرموقة هو الآخر و من نفس الخلفية الدراسية و العلمية أيضاً قائلا :

حضرتك دخلت الجيش ؟

صديقي الثاني : تمويل الجيش ده خدعة بالبلدي. يعني يمولك علشان يضمن تسليحك لانه لو ماعملش كده غيره حايعمل.

صديقي الأول : كل الإضرابات والاعتصامات مظاهر طبيعية مصاحبة لأي ثورة في طور التكوين وده برضه اللي حصل قبل ٥٢ وفي كل البلاد اللي فيها ثورات// الجيش المصري عنده ما يكفي لسد عجز الميزانية لو عايز، بس تفكير القادة الحاليين (اللي هم اختيارهم برضه كان مبني على الولاء لمبارك كأولوية قبل الكفاءة) هو اللي بؤدي للعبة تخويف الشعب بالأزمات وبقانون الطوارئ و"قرص الود" و"ضرب المربوط علشان يخاف السايب" إلخ. الديمقراطية الحقيقة والعدالة الاجتماعية هي المطالب الأصلية للثورة وهي الطريق الوحيد لإنقاذ مصر (وأي بلد)، وواضح إن ما فيش حد في الجيش جرب الديمقراطية ولا اتمرن عليها، لكن هم خايفين منها برضه مع إنها الوسيلة الوحيدة للانتصار على الإخوان وغيرهم من الأحزاب الخالية من ديمقراطية في داخلها

الجيش المصري تاني متلقي للمعونات من أمريكا، يبقى فيه هدف أكبر لخدمة مصالح أمريكا الاستراتيچية مش بس ضمان شراء الأسلحة من أمريكا، لكن ضمان استمرار ولاء مصر لأمريكا وضمان سيطرة أمريكا على المنطقة. لكن مصالح إسرائيل هي اللي بتمشي الموضوع طبعاً والجيش المصري-زي أي جهة بتتعامل مع الأمريكان-بيتقرطس ويتورط في وقت واحد

أنا : لو مش عايز بلدك يبقالها جيش انت حر عايزها دولة محتلة براحتك ... احنا في معظمنا مش هنتناقش معاك في الموضوع أصلا .... معرفش ايه مشكلتك مع الجيش المصري بس خد بالك ان دي مشكلة مع مصر شخصياً .... أعتبرني من لحاسين البيادة ورمٍي ولقًح عليًا كلام للصبح برضه مش هتخرسني .... ربنا يحمي الجيش المصري ويديم علينا وجوده ولو "المرابطين" في التحرير نسيوا يحكولك بعد ما رجعت من السفر مين حمى أهاليهم في البيوت نحكيلك احنا ....

الجيوش النظامية مالهاش علاقة لا بالسياسة ولا بالديمقراطية لسبب بسيط انها جيوش نظامية مبنية على تسلسل القيادة ... لو المعلومة لم تصلك فالدعوة للأنتخابات هتكون 27/9 والأنتخابات شعب 21/11 و شورى 22/1

صديقي الأول : هو أنا فين قلت مش عايز مصر يبقى لها جيش؟ أنا مش فاهم بتجيبي الكلام ده منين.

صديقي الثاني : القادة دول هم الي وقت الجد اختاروا البلد مش مبارك. عايز تفهم البلد اخطف رجلك لمنطقة زي ناهية وقولي دول تتعامل معاهم ازاي. للأسف احنا عندنا ملايين من الجهلة الخارجين عن القانون استخدمهم النظام علشان مصلحته دول مش عايزين ديموقراطية دول عايزين قانون يخافوا منه وبعدين ديموقراطية

صديقي الثالث : لولا جيش بلدنا كان زمانا شغالين بالسخرة عند اليهود

صديقي الأول : إحنا بنأجل الديمقراطية بقالنا ستين سنة وده اللي خلى الناس اللي في ناهية بقوا بالحالة اللي هم فيها.

صديقي الثالث : و ممكن يا استاذ تبص بصة صغيرة ناحية فلسطين و الجولان

صديقي الثاني : الجيش قرطس اسرائيل وامريكا ودخل قوات كبيرة سينا و مش حاتخرج بحجة حفظ الأمن. لازم نتفق ان النظام القديم كان مراهن علي امريكا وامريكا قرطسته و كانت بتظًبط مع الأخوان من 2000 وده علشان تفك منه حاتخد وقت

صديقي الأول : آه بس الجيش المصري مؤسسة فاسدة زي معظم مؤسسات مصر، وبرضه محتاج يتطهر زي كل المؤسسات.

صديقي الثالث : لأ حضرتك ... عندك دليل أنها فاسدة ؟

صديقي الأول : وسايط الإعفاءات/ رشاوي للأجازات/ استخدام المجندين في الدسائس بين الضباط/ إلخ...

صديقي الثالث : حضرتك دخلت الجيش ؟

صديقي الأول : وطبعاً مش هاتكلم على دخل وثروة القادة الكبار لأن احنا متفقين إن القادة غير الجيش كمؤسسة

صديقي الثاني : اما الكلام عن الميزانية الأستراجية بتاعة الجيش فده يأكد كلامي عن المخطط. الميزانية دي لتوفير احتياجات الجيش للحرب بغض النظر عن ظروف البلد لو استخدمتها دلوقتي علشان الموظفين تجيب سلاح منين

صديقي الأول : لأ ما دخلتش الجيش. بس عارف ١٥ واحد على الأقل دفعوا رشاوي وجابوا وسايط...

صديقي الثالث : القادة هما الجيش مش شاريينهم من أمريكا حضرتك

صديقي الأول : القادة مش هم الجيش زي ما رؤساء الجمهورية مش هم الشعب. القادة جزء من الجيش تدرج في المناصب. ليه طنطاوي مثلاً تم تفضيله على واحد عبقري زي أبو غزالة ويوسف صبري أبو طالب؟

صديقي الثاني : الكلام ده اتقال كتير القادة دول ثروتهم كبييييرة فعلا الفرق بينهم و بين كلاب حسني انهم ما سرقوهاش كانت بتدفعلهم رسمي و ده في كل جيوش الدنيا لضمان الولاء. ماهو مش معقولة برضه قائد جيش ويشتري عربية قسط الحاجة أول ابواب الفساد

صديقي الثالث : حضرتك عايش في مصر دلوقتي

صديقي الأول : لأ، بقالي ١٠ أيام في أمريكا. برضه مش فاهم إيه أهمية السؤال ده؟

صديقي الثالث : هترجع مصر و لا هجرة؟

صديقي الأول : هارجع مصر

صديقي الثالث : لو قامت حرب هتتطوع ؟

صديقي الأول : ما اعرفش. دي حاجة وليدة اللحظة، ما أقدرش أحدد قراري دلوقتي.

صديقي الثالث : أنا كده كده هحارب .... لاني كنت ضابط و مازلت علي قوة الجيش لمدة عشر سنين تاني

صديقي الأول : طيب وإيه علاقة ده باللي إحنا بنتكلم فيه ؟

صديقي الثالث : علاقته ان مفيش حاجة اسمها الفرق بين المجلس العسكري و الجيش

التمويل اللي الجيش بياخده للحفاظ علي معاهدة السلام مقابل التمويل اللي اسرائيل بتاخده

صديقي الأول : لأ فيه. المجلس العسكري ده مجلس من قادة الجيش وليس الجيش كله. زي ما مجلس إدارة شركة هو مش الشركة وزي ما الحكومة ليس الشعب وهكذا

صديقي الثالث : ده كلام عمر باشا عفيفي

ثم تطور الحديث الى مناقشات عنيفة حول بعض الشخصيات العامة وعلاقة مصر و تحالفاتها مع أمريكا و اسرائيل والديمقراطية أولاً أم أطعام الفم الجائع ومليء العقل الخاوي و مدى وعي الشعب و كيف يهمشه البعض على طريقة أبراهيم عيسى كانوا عبيداً لمبارك وسيصبحون عبيداً لمن يغلب الآن .. و أصرار البعض الآخر على أن الشعب هو صاحب الكلمة ولولاه لا توجد ثورة ... الخ الخ من كل الجدليات المستفزة واللا منطقية بين المصريين الآن ...

السؤال المؤرٍق حاليأ هي الثورة دي قامت عشان مين !؟ عشان الحرية و الكرامة والعدالة للشعب المصري كله !؟ والا عشان مجموعة صغيرة عايزة تاخد مكان حسني و تقمع المصريين !؟ ... مين هم الثوار و مين هم الفلول !؟

أيه هو التعريف العلمي للفلول اللي لازم تخرس و مانسمعش حسًها !؟ أي حد مش على هوى التحريريين ؟؟ طب أنهي تحريريين ؟؟ ال 16 مليون اللي نزلوا في كل مكان لحد 11 فبراير ؟ ولا ال 200 ائتلاف من ناس لا تفقه الألف من رجل البنطلون في السياسة في العموم و المجمل ؟ ولا نشطاء تويتر أصحاب الصوت العالي ؟ ولا متصدرين الساحات من الأعلاميين و المحامين الطبالين اللي جايبين صداع للمصريين في كل الفضائيات ؟ ... مين بيزايد على مين ؟ على رأي القذافي من أنتم !! بجد من أنتم !!

فين المصريين و فين مصلحتهم من ده كله !؟ زي اللي يقولك خربناها فين ؟ ما هي كانت خربانة أصلاً !! نعم !! طب ماهو عشان كانت خربانة قامت ثورة ... قامت عشان تعمًرها ولا أنتو كنتو بتضحكوا علينا ولا أيه الموضوع !؟ ... بصوا يا جماعة وبالبلدي كده ... يا ثورة حرية و كرامة و عدالة لكل المصريين يا ماتلزمناش ... لا هنسمحلكم تخربوها أكتر ما هي خربانة ولا هنتخرس ونسكت ... كلنا مصريين وكلنا لينا فيها حق و كلمة ... تقولولي فلول تقولولي كنبة ترابيزة فوتيه تقولولي ستوكهولم أو فيينا هو كده ...

يا روح ما بعدك روح و يا بلد ما بعدك بلد .... كفاية بجد كفاية .....

ماذا بعد بلطجة الرأي !؟

لفت نظري في الثمانية أشهر الماضية و منذ انطلاق الثورة المصرية كثير من الملاحظات اللتي تخلق جدلاً واسعاً .. و دائما ما تنتج عن أغفال النخبة الجديدة للحقائق و العمل على اجتزائها .. ربما عن جهل أو استهانة بقيمة المعلومة وربما في أحيان أخرى عن قصد لمصالح و مآرب شخصية .. و ما أن تبدأ في التغريد خارج السرب بعرض فكرة مختلفة أو مناقشة طرح تجده غير منطقي فستجد الأهانات و الأتهامات تنهال عليك من كل صوب و حدب في محاولات مستمرة لتكميم فمك و أقصائك و جعلك عبرة لمن يريد أن يكون له رأي أو قناعة مختلفة عن القطيع .. 

أي عاقل متابع للأحداث منذ بدايتها يستطيع أن يرى أن الثورة المصرية و بصرف النظر عن من أين أتت الشرارة لأنه جدل لم تتكشف حقيقته بعد .. الا أنها كانت هبًة شعبية بامتياز جمعت فئات مختلفة و طبقات متعددة من الشعب المصري على هدف واحد و هو التخلص من نظام فاشل أنتج دولة فاشلة .. و المناداة بالحرية والكرامة والعدالة الأجتماعية .. و بعد أن تم تحقيق الهدف الأول ألا و هو سقوط النظام السياسي الحاكم في مصر بدأت تتشعب الأهداف و تتفرق المصالح و كأنما من قاموا بهذه الثورة قد انقلبوا عليها فجأة عندما شعروا أن مطالبها ممكنة التحقق .. فالبعض "حتى أتفادى التعميم الغير عقلاني" انقلب على مطلب الحرية .. لأنه لا حرية بدون حرية الرأي و هو لا يريد رأياً سوى رأيه هو و كأنه منزًه أو طبعة جديدة للنظام الفاشل الذي شارك في اسقاطه .. فصال و جال تصنيفاً للشعب من كنبة وفلول وثوار الى ليبراليين كفرة وعلمانيين ملاحدة و متأسلمين أبرار وماركسيين زنادقة .. ثم انقلب على مبدأ الكرامة ليجعل الكل بلا كرامة الا نفسه من خلال الهجوم على شخصية المختلف وليس على فكره .. فشخصنة الخلاف في الرأي ينتج عنها و بكل تأكيد عزل شريحة كبيرة من المجتمع عن التعبير عن أرائهم أو حتى محاولة فهم ما يلتبس عليهم من أمور حتى لا يتم الطعن في دين البعض أو وصم البعض الآخر وصمة الفلولية أو الكنبية أو الأنتفاع ناهيك عن الأتهام الجاهز بالجهل و التغييب و مشاهدة التليفزيون المصري .. وأصبح يخلط بين مبدأ العدالة الأجتماعية وفكر لينين وماركس و كأنما لا عدالة اجتماعية بدون الفكر الشيوعي و كأنما العدالة الأجتماعية تعني أما لا وجود لفقراء و هو ما فشلت فيه كل الدول الأشتراكية أو زيادة عدد الفقراء بانتزاع أموال الأغنياء و توزيعها على من لم يعمل و لم يسعى بكد و اجتهاد .. و كأنما العدالة الأجتماعية غير موجودة في دول رأسمالية من دول العالم الأول و كأنما العدالة الأجتماعية تتناقض مع الملكية الفردية و تحارب التميز والأبداع والعمل الجاد والأجتهاد ...

أجد الكثير من النشطاء مقتنع أن البرلمان القادم سيحكم مصر أو سيشكل حكومة تشارك في حكم مصر و هو لم ينتبه لنوع الجمهورية المصرية و ربما لا يعرف الفرق بين نوع و آخر ولا يدرك أن مصر منذ 1952 و حتى اللحظة هي جمهورية رئاسية صرفة .. تعيين الحكومة فيها مسؤولية الرئاسة و الكتل البرلمانية غير ملزمة للرئيس أن يختار منها حكومته ولكن وظيفة البرلمان هي طرح و نزع الثقة عن الحكومات فقط لاغير .. و حتى الأعلان الدستوري القائم حاليا يعتمد الجمهورية الرئاسية كقاعدة مبدئية لأدارة البلاد حتى كتابة دستور جديد والذي لا أعتقد شخصيا أنه بمجرد قبوله من الشعب سيتم حل البرلمان لتُعقد انتخابات برلمانية جديدة بناء على نوع الحكم في الدستور الجديد .. والا ستكون أقصر دورة برلمانية في التاريخ .. اعتقادي الشخصي أن الأعلان الدستوري سيكون دستوراً مؤقتاً حتى بعد انتخاب الرئيس الجديد و حتى تنتهي دورة البرلمان "ال 5 سنوات" و الفترة الرئاسية الأولى لرئيس لجمهورية "ال 4 سنوات" و بالتالي فمصر ستظل جمهورية رئاسية ل 5 سنوات قادمة .. الكل يتغاضى عن هذه النقطة ولا أدري لماذا ؟ هل فعلاً يجهلون !؟

أجد الكثير من "النخبة" الزاعقة الآن ينادي بهدم الدولة على عكس رغبة الشعب .. الشعب أراد اسقاط نظام سياسي وليس أسقاط الدولة بكل مؤسساتها ..و كأنما النخبة الجديدة اللتي أدعت قيادة ثورة شعبية وجدت نفسها تنقلب على الشعب ذاته و تتهمه بالجهل و التخلف طالما لم يجاريها في أرائها المتطرفة .. بل و تتعامل بديكتاتورية أقسى من ديكتاتورية النظام السابق و تُنصٍب من نفسها وصياً على الناس .. خيال النخبة المصرية "اللتي لا يعلم أحد حتى الآن من نخبها" يصور لها أن الصوت العالي سيوصلها الى الحكم حتى و أن لم يرضى عنها الشعب .. فعن أي حرية تتحدثون و عن أي ديمقراطية تتشدقون !؟ .. متناسين أن نخبة أي شعب لابد أن تنبت من هذا الشعب و تعبر عن ثقافته و مشاكله و تركيبته التاريخية بل و النفسية والا فهي مجرد طفيليات متسلقة لابد أن تختفى متى تم حرث الأرض و تجديد الهواء .. فالمجد تصنعه الشعوب ولا تصنعه النخب ..

أجد نشطاء "سياسيين" و مدونين يتبنون أفكاراً عظيمة و مشروعات جليلة و يدافعون عنها بشدة ويدونون لها مدونات طويلة عريضة .. المشكلة الوحيدة أنهم لا يعلمون عن ماذا يكتبون ! بل و البعض يتبنى مثلا القانون الجديد المطروح لأستقلال القضاء و هو لم يقرأه و لا يعرف سبباً لأعتراض البعض عليه أو كيفية حل هذا الجدل و الخلاف .. هل هذه هي القاعدة الآن أن تتبنى و تكتب ثم تحاول أن تفهم أو ربما لا تحاول حتى !؟ ..

أجد نجوماً من نجوم الأعلام "الجديد" يتشدقون بمباديء الحرية و يطالبون بأقصاء من لا يعجبهم دون أن يرتكب جريمة سوى التعبير عن رأيه الذي لا يجد رضاً منهم .. متناسين أن لا حرية ولا كرامة بدون حرية الرأي .. بل و يذهبون الى وصم المختلف بالأمراض النفسية و الأنحراف الفكري في محاولة مستميتة لتأسيس عصرهم الخاص من الديكتاتورية المبنية على محاكم التفتيش و أطلاق الأحكام على طريقة آلهة الأوليمب مُنزٍهين أنفسهم عن النقد .. لاعبين على مخاطبة العواطف و ليس العقول باجتزاء المعلومات و تفادي ذكر الحقائق و البعد عن الموضوعية .. و هي مساهمة كبيرة منهم في تغييب الوعي و التدليس على الناس و خداعهم .. هل نحن بصدد "طُغمة" حاكمة جديدة تحتكر الحقيقة و توزع صكوك الغفران !؟

أجد الكثير من الشباب يغضون الطرف عن معاناة الناس و هم يعترفون أن الناس أصبحت تكرههم .. و في نفس الوقت يزيدون في استفزاز الناس لتكرههم أكثر بغباء منقطع النظير و كأنما يعملون طواعية على أفشال حدث عظيم جليل في تاريخ مصر ربما ينقلها الى أفاق جديدة متى ما تم التأسيس لنظام سياسي شرعي وأعمال دولة القانون .. بل و يذهبون بعيداً لرفض دولة القانون والبعض منهم يريد أن يفرض معاناته الشخصية و مشاكلة الخاصة و يصل الى مرحلة أما تنفيذ رأي الخاص "أو مش لاعب و هانزل أولع فيكو" !! .. عن أي ديمقراطية يتحدثون !؟ ..

أسئلة كثيرة تجول في ذهني .. هل القادم أسوأ ؟ .. متى كان قطع الطريق حقاً شرعياً لأي شخص يحتج على أي شيء ؟ .. ماذا بعد هدم الدولة ؟ .. مَن مِن الزاعقين يتحمل مسؤولية أفعاله و مطالباته الغير منطقية اللتي يريد ان يفرضها على المجتمع ؟ .. هل يعرفون ما هي الديمقراطية أصلاً ؟ .. و المهم لماذا يريدون أن يحولوا شيئاً جميلاً شاركنا كلنا فيه الى كابوس لا ينتهي ؟ .. و الأهم متى يبدأ البناء ؟ .. ألا يوجد أي شخص يريد أن يعمل !؟ .. هل من مجيب !! متى نبدأ في البناء و متى تنتهي الرعونة السياسية و ماذا بعد بلطجة الرأي !؟

خلف القناع

يحيرني دائماً ماهو خلف القناع وليس القناع نفسه مهما كان مبتكراً أو غير أعتيادي .... فخلف القناع دائما قصة .. خبرة .. دافع ما يدفع الأنسان ليتخفى وراء قناع ....

ربما كانت الأقنعة من أولى الأختراعات البشرية فقد استخدمها الأنسان البدائي في حربه مع الطبيعة ليصيد فريسته ... ثم استخدم جماجم فرائسه لتكون أقنعة احتفالية تعبر عن قوته وقدرته على قهر الطبيعة وأثبات أنه هو سيد الأرض والمُستَخلَف عليها .... و مازالت بعض القبائل الأفريقية و في أمريكا اللاتينية يتمسكون بأقنعتهم المهيبة في مناسبات كثيرة وطقوس عديدة ....

حتى المصريون عرفوا الأقنعة فسبكوها من الذهب لتغطية وجوه ملوكهم الموتى حتى لا تضيع ملامحهم مع الزمن .. ومن منًا لم ينبهر بقناع الملك توت الذهبي .. وأدعي أنني شخصياً أُخِذْتُ به و ظللت كثيراً أبحث في ملامحه عن شيء يشبه ملامحي .. قد يضحك من يقرأ هذه السطور ولكنها الحقيقة وهي أيضاً أثبات على رجاحة الفكرة و عبقرية من ابتكرها ليحفظ ملامح مليكه و يتحدى الزمن قبل أن يعرف العلم طريقة لأعادة صقل الوجوه و نحت الملامح من جماجمها ....

الأرستقراطية الأوروبية في العصور الوسطى وجدت غاية جديدة في الأقنعة .. المتعة ولو لليلة واحدة يتقمص فيها الأنسان شخصية خيالية أو أسطورية تحرره من رتابة حياته اليومية .. و تمنحه قليلا من الرضا عن النفس و التحرر من القيود و ربما المغامرة ....

الأقنعة مُحَرِرَة هكذا اختار شيكسبير أن يعبر عنها في رواياته .. فعندما ترتدي قناعك تستطيع أن تُعَبٍر بحرية أكثر عن ما يجيش في صدرك من حب أو ربما بغض !! .. تتحرر من شخصيتك اللتي تقيدك و تتنصل من كل مسؤولية لتنطلق و تُطلق العنان لكل ما يجيش في صدرك ....

ربما كان هذا ما يجعلني أفكر في الأقنعة كثيراً هذه الأيام .. فالكل يختفي خلف اسم مستعار وقناع مختار ليكتب ما يريد عمن يريد أو يطلق أشاعة تفتك بأيٍ من كان مسيئاً استخدام طفرات البشرية الأليكترونية .. و كأننا نسخر من ماضي الأنسانية ولا نتعلم منه الا كيف نسيء أستخدام اكتشافاته اللتي كانت يوماً حدثاً عظيماً أو اختراعاً فريداً ....

ولربما كان الأسوأ من الأسماء المستعارة هو الأفكار المستعارة فكم من البشر يلعبون بالألفاظ و يتفننون في تلوين شخصياتهم ويبدلون الأقنعة حتى يصلوا الى غاية أو غايات لا يدركها من حولهم ألا متأخراً و ربما متأخراً جداً .. وهنا لا أعني السياسة فقط و أنما حتى في الحياة العادية اليومية لكل منًا .. وتكون الصدمة عندما تهوي و تسقط الأقنعة ولا محالة فلابد لها من أن تسقط ولو للحظات قصيرة .. و قد يكون في سقوطها سقوط في هاوية تدمر من استخدمها الى غير رجعة ....

دعونا لا نظلم كل من يرتدي قناعاً .. فهناك من يرتديها ليس خداعاً ولا استعلاءً و أنما حماية لنفسه أو ربما ليعزل نفسه عن محيطه .. وما أكثر الأسباب في الحياة اللتي تجعل الأنسان يزهد في حياة مخيبة أو مجتمع منافق .. البعض يسميها تِقْيَة اجتماعية أو ربما نفاق .. والبعض الآخر يجدها احتفاظاً بالحق في الخصوصية خاصة في مجتمعات لا تعرف حدوداً بين الحريات العامة والخاصة أو بين التقاليد الأجتماعية والخصوصية الشخصية .. مجتمعات لا تحترم التميٌز الفردي بل قد تذهب حتى لتُميٍز ضد التَميز والأبداع ....

دعونا نواجه أنفسنا .. من منا لا يحتفظ بقناع أو اثنين لمناسبات معينة أو عند التعامل مع مواقف محددة مسبقاً .. هل نستطيع أن نتخلى عن أقنعتنا و نسقطها بأنفسنا قبل ان تسقط من تلقاء نفسها ؟ .. هل نبحث عمن يستطيع ببصيرة نافذة أن يخترق كل الأقنعة ويقرأ ما خلفها ؟ .. أم هل نختار بأنفسنا لمن نعطي هذا الحق ؟ .. هل نخشى من يستطيع أن يقرأ ما بداخلنا أم نُقَدٍرُه ؟ ....

أسئلة كثيرة تدور في عقلي حتى عن أقنعتي أنا شخصياً .. والأجابة الوحيدة اللتي أستطيع أن أصل أليها هي أنه لا ثوابت في الحياة .. منطق الأمور يختلف من مكان الى آخر ومن ثقافة الى أخرى و من أنسان لأنسان مختلف في الشخصية والخلفية والتركيبة النفسية .. و أن كنت أتمنى أن أجد مكاناً لا يضطر قاطنوه لأرتداء الأقنعة .... لا تصدقوا شكسبير الأقنعة ليست دائماً مُحَرٍرَة ....

أنا عايزة أحارب ..... كتبت بتاريخ27-6-2011

بقالنا فترة عمالين نسمع و ابتدينا نشوف الوثائق "المُوَرٍطَة" لكل الناس اللي ما بيحبهومش الدكتور محمد البرادعي في تصدير الغاز الى اسرائيل ..... آخر اتنين عمرو موسى و عمر سليمان .... يا ترى ليه ؟

يا ترى علشان لو استبعدنا اللجان الأليكترونية من تصويت المجلس العسكري هيكون الأتنين دول الأهم عالخريطة ؟ و الا عشان ليهم شعبية في الشارع اللي فيه أعلاميين محنكين بيتجاهلوه و بيكرهوه في الثورة يوم ورا يوم على رأي سميرة سعيد ؟

عمرو موسى قالك دي عملية اغتيال سياسي و أنا هاطلب من الخارجية كل الملفات .... ماشي احنا منتظرين ....

جه النهارده الدور على عمر سليمان .... الجنرال اللي باع مبارك بعد 12 ساعة من تسليمه مهام رئيس الجمهورية و انتحر سياسياً عشان بلده ما تولعش .... و من ساعتها اختفى و قالك مش عايز أكون رئيس ... آه قالها صراحة لكريستيان أمانبور في المقابلة الشهيرة .... سمعته بودني ... لأ أنا مش عايز أكون رئيس أنا سني كبير ..... و مش هادخل في جدل الشعب ينفع ديمقراطي و لا لأ .... أصل أنا سمعتها بالانجليزي و ما احتاجتش الترجمة و اللي مهتم يا ريت يسمعها باللغة اللي اتقالت بيها و يقوللي المعنى اللي قاله يفرق ايه عن كلام البرادعي و موسى و غيرهم .......

ما علينا البرادعي مش عايز عمر سليمان رئيساً ده حقه .... ما ينتخبهوش .... ابراهيم عيسى مش عايزه يترشح أصلاً ... لأ ده مش من حقه .... ليه هو محصلش العوا و لا أبو سماعين ؟؟ .... كل مواطن مصري تنطبق عليه شروط الترشيح من حقه يترشح .... و كلام أم باتعة الداية على قناة التحرير بيخلق قرف و عِنْد في الشارع و القلم الجاي هيلسوع 

و عموماً اطمنوا الراجل مش عايز .... قرفان من شعب لا يقدر ما يصنع من أجله .... نظام السادات كده .... كان خسارة فينا فقتلناه ....

لحد الوقتي المخاطبات بتتكلم عن "النظر" .... مواعيد توقيع عقود .... سرعة الرد .... لا اتكلمت في سعر و لا ده يخص المخابرات و المخاطبات كمان بتتكلم عن اسرائيل و تركيا ... الغاز المصري بيتصدر لأسرائيل و تركيا و الأردن و أسبانيا و سوريا و يمكن غيرهم كمان .... الفكرة بس أن ليه محدش بيقول أن الغاز المُسَال مالوش علاقة بالبيوتان اللي بيتعبى في أنابيب البوتاجاز و ليه محدش بيقول أن فيه علاقات اقتصادية و تبادل تجاري مع اسرائيل بموجب كامب ديفيد من أول التمانينات و فيه مصانع في العاشر و العبور

فيها فساد ! .... أكيد فيها فساد لكن هي المشكلة في السعر و الفساد و الا المشكلة في التبادل التجاري و كامب ديفيد ؟ .... كمان ليه محدش بيقول أن التبادل التجاري لازم يكون تحت نظر المخابرات و مع أشخاص منتقين من مؤسسة الرياسة للشراكة في الأعمال لأن القانون المصري يمنع تملك الأسرائيليين داخل مصر و بالتالي لازم تضمن مين يشاركهم و أنه ما يجيش يبيع المصنع أو الأرض و يدخلنا في تحكيم دولي يعمل سابقة  و يجيبلنا نصيبة فتحي .... الرئاسة اختارت غلط ! أكيد ... حسين سالم فاسد و حرامي ! مفيش جدال لكن ده قرار سياسي مش قرار المخابرات 

المشكلة فين ؟ مش عايزين نصدر غاز ؟ ليه ؟ وقت ما ابتدى تصديره كان فائض و مش محتاجينه لانتاج كهربا .... حاليا محتاجينه ؟ معرفش أصحاب الخبرة يقولوا ... لو محتاجينه يبقى يتوقف تصديره و اللي يعوزه البيت يحرم عالجامع ... لو زيادة يبقى يتصدر بالسعر العالمي لأسرائيل زي غيرها مش بيجيب عملة صعبة ؟

المشكلة في العلاقات التجارية مع اسرائيل ؟ ده شيء متفق عليه و متوجب بناء على اتفاقية السلام و فيه دول عنترية بتاعة شعارات بتفضل تستثمر في اسرائيل أحسن ما تستثمر في مصر و من غير سلام ... تعديل الاتفاقية كان مفروض في 2009 بعد مرور 30 سنة عليها ليه ما حاولناش ناخد منها منفعة أكبر ؟ يساءل مبارك لأن برضه ده قرار سياسي .... 

اسرائيل عدو ؟ ماشي مش مختلفين ... عدو تاريخي لكن لينا معاه حدود و المجهود اللي اتعمل علشان نوصل لاتفاق كل العرب فشلوا فيه مش قليل و قصاد ده أمريكا بتدفع مساعدات خرافية .... راحت فين المساعدات ؟ الفرق بين جيش مصر سنة 79 و النهارده خرافي و اللي ما يشوفش من الغربال يقرا تقارير ال سي أي أيه

طب المساعدات المدنية راحت فين ؟ .... اتسرقت .... العصابة "المفترية في البلاطي مدارية" الحاكمة سرقتها على مدار 30 سنة .... ده ذنب أمريكا ؟ ممكن .... ذنب ضمني .... لكن مش ذنب اسرائيل و لكن بالتأكيد ذنبنا احنا ..... سكتنا ليه !! 

مش عايزين نعرف اسرائيل و مش عايزين كامب ديفيد و عايزين نحارب ؟ و ماله قرار استراتيجي مهم .... لينا فيه مصلحة ؟ و الا احنا أُجَرِيًة و مرتزقة عند العرب ؟ اللي على فكرة مش هيصرفوا على الحرب برضه .... أصلهم يا عيني ليهم علاقات و استثمارات مليارية مع اسرائيل و عايزين يحافظوا عليها .... 

عايزين نحارب ليه ؟ سينا ما شربتش دم كفاية ؟ مين يستاهل أن مصري واحد يموت تاني عشانه أو شبر أرض يضيع ؟ و محدش يقوللي المسجد الأقصى أبوس ايديكوا عشان دي جدلية عظيمة و نتايج الحرب غير مضمونة .... يعني بدل ما نرجع الأقصى ممكن نخسر القاهرة مش سينا بس .....

أنا شخصياً عايزة أحارب .... أحارب الجهل و المرض و العوز و أزرع أكلي و أصنًع هدومي و معداتي عشان أكون سيدة قراري .... ساعتها أقدر أحارب مش بس عشان الأقصى لكن عشان أرض فلسطين التاريخية من النهر الى البحر .... 

مين ضيع علينا 30 سنة يعتبروا في عمر الدول كتير ؟ 30 سنة كان ممكن نكون فيهم ألمانيا أو اليابان !!! ..... و النبي محدش يستهبل و يقوللي المخابرات .... لأ صاحب القرار السياسي المصري هو اللي اختار نظرية مش عايزين وَشْ احنا طالعين أعارة و جايين نسترزق .... شوية مع الوهابيين و غزوهم اللا فكري و شوية مع الأمريكان بتوع مصلحتي و أنت اتحرق  

ما ينفعش نلوم دول بتدور على مصلحتها عشان احنا عالم خِرْعة مش عايزة لا تفكر و لا تشتغل !! و شعارات عبد الناصر تشتغل و الحكومة هتعلمني و تعالجني و تأكلني و توظفني و تجوزني و تسكني ..... و مش بعيد تفليني كمان .... 

أفضل شيء كان ممكن يحصل لمصر في العصر الحديث هي ثورة يناير اللي هدت نظام فاشل أجوف عامل زي عصا النبي سليمان "مع الفارق طبعا" .... يا ترى هنفوق و الا هترجع مصر لعادتها القديمة ؟

يا ريت نسمي الأشياء بمسمياتها و نقرا التاريخ بموضوعية "مش التاريخ اللي كتبه هيكل" و أمثاله من المزورين  و المسلاتية ..... 

النبي نفوق و نشتغل و نصلًح الله يكرمكوا عشان أنا عايزة أحارب

ارهاصات استفتائية .... كتبت بتاريخ 11-6-2011

الأستفتاء كان بنعم على العمل بدستور 71 مع تعديل 8 من مواده و الغاء مادة ..... هو فين دستور 71 ؟ هل مصر الآن خاضعة لدستور 71 أم أعلان دستوري من 68 مادة !! و قبل الأستفتاء أعلن المجلس العسكري أنه في حالة التصويت بنعم سيتم تعديل دستور 71 و العمل به حتى انتخاب برلمان و رئيس "ربما" يقرران كتابة دستور جديد للبلاد .... و في حالة التصويت بلا سيتم العمل بأعلان دستوري مؤقت حتى كتابة دستور جديد .... احنا فين الوقتي ؟ التصويت كان بنعم لكن المجلس العسكري اختار مسار لأ مع خلطه خلطاً خزعبليا بمسار نعم    

المادة رقم 189 و 189 مكرر في الأستفتاء على دستور 71 تتكلمان عن برلمان و رئيس يجتمع الأعضاء المنتخبين من البرلمانين "شعب و شورى" مع الرئيس للدعوة لكتابة دستور جديد اذا وافق ثلثي الأعضاء المنتخبين و هكذا تختلفان تماما عن المادة 60 في الأعلان الدستوري اللتي أغفلت المادة 189 و احتفظت فقط بالمادة 189 مكرر اللتى تعتمد عليها و هو عك قانوني حيث ألغت وجود الرئيس و جعلت البرلمان "منفرداً" هو صاحب القرار في اختيار اللجنة التأسيسية و اقرار كتابة دستور من عدمه بما يتنافي مع العدالة في نظام الأنتخاب على مرتين لأنه بما أن الشعب مصدر السلطات فلماذا لا ينتخب الشعب اللجنة التأسيسية بل ينتخب من يختارها أو ينتخبها بالنيابة عنه !! و يتنافى كذلك مع مبدأ تضارب المصالح اذ كيف يكتب البرلمان دستوراً يحدد صلاحياته و كيفية الرقابة عليه و الجهات اللتي تنظر في الطعون على عضوية أعضائه أو رفع الحصانة عنهم .... و كيف يحدد البرلمان صلاحيات الرئيس ؟ من المنطقي أنه سيجعل كل الصلاحيات له فقط و بالتالي ينتج عنه رئيس شخشيخة أو بهلوان بلا صلاحيات و هو ما يتناقض مع الرغبة الشعبية ..... و كيف يصنع البرلمان كل أطر الرقابة على السلطات الأخرى من قضائية و تنفيذية !! فمنطقي أن يضعها كلها بيده و هو ما يتنافي مع الديمقراطية القائمة على تعدد و استقلال السلطات ..... اذ كيف يصبح البرلمان أقوى من السلطة القضائية اللتى لابد أن تكون هي الحكم في شرعيته و شرعية العضوية لأعضائه !!    

من كوًن لجنة لتعديل الدستور مبدئياً كان مبارك بترحيب من الأخوان فقط .... ثم سيادته أسقط الدستور بتسليمه ادارة البلاد الى المجلس العسكري بمخالفة الدستور الذي ينص على تسليم ادارة البلاد لرئيس مجلس الشعب "كما حدث بعد اغتيال السادات" اذا كان المجلس منعقداً أو لو كان المجلس منحلاً يتم تسليم أدارة البلاد الى رئيس المحكمة الدستورية العليا .... ثم أسقط المجلس العسكري الدستور مرة أخرى بحله لمجلسي الشعب و الشورى بمخالفة الدستور الذي يمنع السلطة المؤقتة من تعطيل الدستور أو حل البرلمان .... بل و عطل العمل بالدستور تماما في بيانه رقم 3 يوم تنحي مبارك .... فلماذا اذاً يعدل دستوراً قد عطله !! ناهيك عن أن أي ثورة على نظام حاكم هي ثورة على النظام و دستوره و بما أن ثورة 25 يناير أسقطت النظام الحاكم فقد أسقطته مع دستوره الذي يعتبر مانيفستو حكمه

من مصلحة كل القوى السياسية و خاصة اللتي تدعي أغلبية ساحقة كتابة دستور قبل الأنتخابات البرلمانية لأنه بعد كتابة الدستور لابد من حل البرلمان و الدعوة لأنتخاب برلمان جديد "في حال قبل الشعب بالدستور الذي سيكتب" و بذلك ستضيع أموالهم و دعاياتهم على أقصر برلمان في التاريخ .... بينما لو أجتمعوا مع القوى السياسية الأخرى على كتابة دستور أولا فستكون رسالة تطمين للشعب بأنهم جزء أصيل منه لا يسعون الى نصب أي فخ لهذا الشعب مما يمكن لهم القفز على السلطة الى الأبد و الغاء كل أحلام الديمقراطية و الكرامة بل سيكون انتخابهم بعد كتابة الدستور انتخاباً سليماً لا يمكن الطعن عليه ..... ناهيك عن درء الشبهات عنهم بأنهم لا يعلنون عن نواياهم في كتابة دستور دولة التمكين و اعلان الخلافة و تملك الأرض و من عليها و أنهم قادمين لسرقة ثورة الشعب و تحويلها الى مغانم مع توعدهم لأصحاب الأفكار المختلفة من اليساريين و الليبراليين أصحاب الفكر العلماني "اللي مش عدو الدين و المصحف" الداعي لفصل الدين عن الدولة أي عدم حشر الدين في تسيير أمور الدولة و عدم الأتجار به لهزيمة الأعداء" توعدهم بالويل و الثبور و عظائم الأمور

مصر على مفترق طرق من سكة السلامة و سكة الندامة و سكة اللي يروح ما يرجعش "و حقيقة أنا مش عارفة الفرق بين الاتنين الأخرانيين سوى أنهم سكة رايحة أجيب أومو و سكة رايحة أجيب طابع بوسطة" .... و بما أن شباب التحرير لا يفقهون الألف من رجل البنطلون في السياسة و الشعب بيكرههم عمى و حسبانهم على الليبراليين هيودي الليبراليين ورا الشمس .... و بما أننا منذ اللقاء المسرحي لل 300 أئتلاف فاشي و المجلس العسكري في حالة من الهدوء الذي يسبق العاصفة ..... فواضح أن الرز بيتفلفل على نار هادية و النتيجة هتكون شيلني و أشيلك ..... و أنا شخصياً رايحة أجدد الباسبور

على ماذا كان الأستفتاء !؟!؟ .... كتبت بتاريخ 20-3-2011

الأستفتاء لم يكن أبدا بالأمس على مواد الدستور الثمانية ... كانت عملية تفنيط للقوى السياسية على الأرض ذكية للغاية ... الأخوان برشطوا كالعادة على شباب الثورة و باعوهم بسرعة أمام أغراء السطوة و النفوذ و المكسب السريع كما فعلوا مع ناصر و السادات من قبل و الآن يفعلونها مع شباب 25 يناير و البرادعي .... استخدموهم لمصلحتهم و لما أدوا الغرض ... بخ ... الأخوان و السلفيين فى حالة سَرْعَة غير طبيعية على جني المكاسب ....

الأستفتاء بالأمس كان علي من هو الأقوى ؟ الأخوان أو الليبراليين؟ المسلمين أو المسيحيين ؟ الجيش أو الثورة ؟ الشعب أو شباب التحرير ؟

من قال لا 3 مجموعات ... شباب التحرير, الليبراليين الباحثين عن الدولة المدنية, و المسيحيين ضد حشد السلف و الأخوان .....

من قالوا نعم أيضا 3 مجموعات .... الأخوان و السلف و من تأثر بدعاياتهم "نعم مع الله, و الواجب الشرعي و حماية المادة 2 الغير مستفتى عليها أصلاً و البتنجان",و من يريدون الأستقرار و دعم الجيش و دفع عجلة الأقتصاد و سرعة عودة الأمن المفقود, و حزب الكنبة و هم المجموعة الأكبر و المجموعة الغالبة كما أرى اليوم في الشارع المصري "و أنا عملي في الشارع طول النهار و يجعلني أتحدث الى كل الطبقات" ...

ببساطة الغالبية العظمى من الشعب اختارت أن تتحدى من همًشَها و خوًنَها و اتهمها بالخنوع و لم يقدر ماحدث لها و ما فُعِلَ بها أثناء الأسبوع الأول من الثورة .... تحدت من تعالى عليها و قال عنها حزب الكنبة .... اختارت أن لا يصنع القرار السياسي في ميدان التحرير و أن تتحرر من فوقية و علوية ميدان التحرير "و أسيادنا اللي في التحرير" و انفرادهم بتقرير مصير شعب عظيم و أمة حية لم يلتفتوا اليها و تباروا في نعتها بأشنع النعوت .....

الثورات يقوم بها دائما أقل من 5% من الشعب و لكنها لا تنجح و لا تصبح شرعية الا أخذت شرعيتها من الشعب و الشعب المصري لن يشرب مقلب جمال عبد الناصر الذي أدى الى مبارك مرة ثانية ... و هو ما تجاهله شباب التحرير "و أنا لست ضدهم على الأطلاق" و هذا لأنهم مسيًسين و ليسوا سياسيين .... لم ينتبهوا أن جمهورهم و زبائنهم هم الشعب المُرَوًع و الغير آمن و الموقوف الحال ...

و لم ينتبهوا أن لغتهم الفوقية لم و لن تصنع منهم أبطال ... و لم ينتبهوا أن الأشياء ان زادت عن حدها انقلبت لضدها ... و لم ينتبهوا أن الجمع اللا منتهية و الضغط على الشعب في رزقه و أمنه بتكوين هذه الكتلة الحرجة دائما في ميدان التحرير ستجعله نفسياً يرفض ميدان التحرير ..... لم ينتبهوا أن المصريين هم أذكى شعوب الأرض على بساطتهم و هم أكثر شعوب الأرض احساساً بكرامتهم و أنهم يصبرون على المهانة مكرهين و لكن عند الرد هم الفراعين ....

لم ينتبهوا أن الشعب يستطيع أن يستعمل الصندوق كما يريد لأسقاط من يريد حتى لو كان هو من أوصله الى هذا الصندوق .... درس عظيم من أمة عظيمة حية ..... درس للنخبة و تعبير عن أن هذه النخبة فاشلة و ليست لها قاعدة شعبية و لا تأثير ... و هي خسارة كبيرة للوطن و لكنها الحقيقة فالتنظير في الفضائيات و الأستعلاء على الناس لا يمكن أن يجعل هؤلاء الناس يشعرون بالانتماء لهذه النخبة ...

الدرس واضح و صريح أتمنى أن تراه النخبة المثقفة في مصر و أن تنزل من عليائها الى الشارع و تقترب من الناس أكثر فهو واجبها الوطني و المجد لا تصنعه النخب و لكن تصنعه الشعوب ....

أتمنى أن يستفيق شباب 25 يناير و يغيروا من أسلوبهم الفوقي المُخَوٍن للشعب على طريقة "أنت معانا و الا مع مبارك" و يستمعوا أكثر و ينظموا صفوفهم أكثر و يتعلموا السياسة بحرفية و ليس بعنطظة .... و أن يعرفوا أنهم لا يستطيعوا انتزاع الشرعية بميدان التحرير بعد ذلك ... و انما الشرعية من الصندوق ... فالشعب صوت ضد ميدان التحرير و سلطة ميدان التحرير ... الشعب يريد الأمن و الأقتصاد و دولة القانون اللتي لا تُهان هيبتها و لا يصنع قرارها في الشوارع و الميادين انما على يد أهل الثقة و المؤتمنين ....

كل هذا كنت أراه من يوم حزب الكنبة و حتى الأمس و كان اختياري "لا" لأن أسباب ال لا عندي كانت أكثر من أسباب ال نعم و لأن مصر فوق الجميع و مع ذلك أحترم قرار أغلبية الشعب و أقدره و أتفهمه و أعلم لماذا اتخذه و لماذا مصر ستكون دائما في أمان طالما علم السياسيون أو من يدًعون السياسة قيمة هذا الشعب ....

لك الله يا مصر و سلاماً يا بلادي ......

رسالة الى "اللى مش حزب الكنبة" يعنى المصريين اللى مش شِلَت .... كتبت بتاريخ 24-2-2011

 اللى يقول لكم أنتم حزب الكنبة و شِلَت ردوا عليه و قولوا له أنت جاهل لأنك ببساطة معندكش أى فكرة احنا اتعمل فينا ايه و شوفنا ايه و استحملنا ايه .... و كمان مره جاهل عشان بتعمم على 80-85 مليون بنى آدم جوة و برة مصر

أصلي قريت نوت لطيفة كده و عنوانها ملفت ... اللى كاتبها عاوز يقول للشعب المصرى اتنيٍل و سد بقك ... هو أنت لا منك و لا كفاية شرك !! و الا أنت صدقت صحيح حكاية حرية و ديمقراطية للجميع ؟؟؟ لأ و ايه أسلوب متعجرف و تِنِك و لا جمال مبارك فى زمانه

المهم .... ماسكة نفسى و كاتمة بقى و عمالة أقول اللهم طولٍك يا روح .... بس الصراحة و بعد الفوضى المزرية اللى وصلنالها فعلا مش قادرة أسكت ..... و خلاص بقى هقول اللى عاوزة أقوله و رزقى على الله ... كده كده هاتشتم و كده كده الأيام السودة بدأت و أخرتي فى سجن مؤبد من بتوع الأخوان اللى تحت الأنشاء الوقتي لو مالحقتش ألٍم عزالي أو أتنكر فى صورة زجاجة

أنا بس عاوزة أفك عن نفسى لحسن أطق ..... وهأوجه كلامى للأستاذ المحترم ديك البرابر و أول شىء لازم يذكر هو بيت للشاعر أبو الأسود الدؤلى بيقول فيه ......

لا تنهى عن فعل و تأتيَ مثلهُ ..... عارٌ عليكَ اذا فعلتَ عظيمُ

 أنت مين عشان تعرًف و تصنًف شباب 25 يناير و اللى معاهم و اللى مش معاهم .... ما تسيب التاريخ هو اللى يقرر و الا ده احتكرته هو كمان ؟ عمري ماحسيت اننا محتاجين قانون ضد الأحتكار زي النهارده .... لأ و كمان محتاجين قانون ضد الأحتقار

مين وائل غنيم ؟ مش شغلك .... وائل غنيم شخصية غامضة ظهرت يوم 8 فبراير بالليل بعد ما كان المولد قرب ينفض فى عربية الدكتور حسام بدراوى .... اتنسب له ايه ! و هو ادعى ايه ! و نفى ايه ! مش مشكلة أبونا الوقتي ... الأيام هى اللى هتقول لنا مين هو وائل غنيم ... يستحق احترامنا و الا لأ .... زيه زى أى شخصية "عامة" بيختلف عليها الناس

أنت جاهل كمان مرة عشان ماتعرفش مين حسنين هيكل .... حسنين هيكل بتاع "البؤر" خلٍيه يحكيلنا و هو شاهد على العصر و أكبر مسلاتى فى العصر الحديث قضى عمره يمجد للديكتاتورية و حكم الفرد .... خليه يحكيلنا "الزعيم الخالد" جمال عبد الناصر عمل ايه فى الرئيس محمد نجيب ؟؟؟ و عمل ايه مع السنهورى باشا فقيه الفقهاء القانونيين و صاحب دستور 1954 ؟؟؟؟؟ و هو شخصياً "هيكل بيه" عمل ايه فى مظاهرات الطلبة 1971 اللى كانت لمطالبة السادات باتخاذ موقف و اعلان الحرب ؟؟ و طردهم ليه لما راحوله الأهرام اللى كان ماسكها فى الوقت ده و جابلهم البوليس ؟؟؟؟؟ و بما أنه أكبر عدو للفساد ممكن يحكيلنا شوية عن البيزنس بين ابنه "أحد الأغنياء فى العالم على قوائم فوربس" و بين هيرمس "و كلنا عارفين علاقة هيرمس بجمال مبارك" .... و الا ما يرضاش ؟

انت عبيط لو خلطت بين معرفة الناس لمسئولية مبارك عن 30 سنة هم و غم وبين الأصل الطيب اللى بيرفض التمثيل بأعدائه .... و بعدين مش انت راجل ديمقراطى !!!! لأ واضح فعلا انك راجل ديمقراطى ..... أوي صراحة

الأخوان .... و ما أدراك ما الأخوان ..... مش عايز الناس تخاف من الأخوان ؟ طب انت تعرف ايه عن الأخوان ؟ بيتهيألى لو تعرف أى حاجة عنهم و بتدعي لنفسك الدفاع عن الحرية كان زمانك مسروع منهم أكتر ما أنت مسروع من اسرائيل .... بتقول الفيصل الأنتخابات ! أنا معاك ... بس كمان ماتنساش انهم الفئة الوحيدة "تقريبا" حالياً اللى معاها فلوس زي الرز و تعرف كويس تجيٍش فى الأرياف زى ما الحزب الوطنى كان بيعمل تمام و مش هقول أكتر من كده

حَمٍل مبارك ذنب 30 سنة بس ماتحمٍلوش ذنب 60 سنة و ماتنساش ان الفساد و المعتقلات و مراكز القوى من قبله بكتير .... صحيح هو خربها و جابها أرض بس هو كمان مش جاى من هونولولو ... الفساد فى مصر من تحت لفوق و من فوق لتحت من قبل ما هو يحط رجله فيها و ده برضه ما ينفيش مسؤليته .... مش عايزين مبارك و لا أى حاجة من ريحة مبارك ... خلاص ارتحت !!!

و الغريبة يا أخي أن أعلى الأصوات و أسلط الألسنة هى للي كانوا أكثر المنتفعين من نظام مبارك و الحزب الوطني ... اللى اتعلموا بالكوسة و اتعينوا بالكوسة و اشتروا شاليهات فى مارينا برضه بالكوسة و غيره و غيره و تلاقى الواحد فيهم كل ما عام أكتر فى صلصة الكوسة كل ما عمل فيها عنتر و طَوٍل لسانه على الناس اللى كِفْرِت في عيشتها في عهد مبارك

الثورة المضادة .... شيء طبيعي انها تحصل ... أمال عايز البلاوي اللي كانوا موجودين يسيبوهالك كده بالساهل ؟ لو واثق من أسس ثورتك و الأسباب اللى أدت اليها و الناس اللى اتسحلت و ماتت و الناس اللى اتربالها الرعب ما تخافش أوي كده من الثورة المضادة .... بس و النبي بلاش النظرة الفوقية لعامة المصريين و بلاش أسلوب الجزيرة في احباط الناس و تدمير معنوياتهم .... مفيش مصري أهبل يا عم الحاج و بعدين بلاش رمي البلا على كل من هب و دب وكأن كل اللى كانوا موجودين فى مصر خلال ال60 سنة اللى فاتوا كلهم خونة و انت بس اللى طاهر و عمرك ما جبت واسطة من الحزب الوطنى .... و الا انت ماكنتش عايش في مصر أصلا !!!!

موضوع نخاف من اسرائيل ده مشككنى انك أصلا عندك أى فكرة عن ثقافة المصريين بعد 73 و موضوع الغاز ماتديهوش أكبر من حقه .... بيزنس .... صحيح بيزنس فاجر .... بس فى الآخر بيزنس و أهو كله قدام النائب العام و كتير ورا القضبان و لو شاطر قدم بلاغ و هات اللى عمل الصفقة دى و حاسبه ... انما محسسني ان المصريين كلهم عملاء لأسرائيل و انت بس اللى وطني !!!! يا خيٍ

ايران مش عدو ؟؟؟؟ انت جاى منين ؟؟ ايه !! معلوماتك كلها من الجزيرة ؟؟ يا راجل يا أمير ما تقرا التاريخ .... اقرا بس عشان أنا معنديش خُلق أقعد أفهٍم فى واحد كل معلوماته كومبو و تيك أواى

حلو أوى انك فاهم العلمانية بس أوعى تتخيل ان باقى المصريين حمير و مابيفهموش .... مش كل المصريين عايشين على الكوبى بيست ..... و بعدين ازاى حرية و عدالة اجتماعية و علمانية و بتمجد فى الأخوان ؟ انت عمرك ما دخلت نقابة فى مصر ؟؟؟ خدلك لفة فى النقابات المتأخونة و بعدين ابقى قوللى رأيك

المصريين اللى حاسين بالقلق على بلدهم وولادهم و مستقبلهم عندهم حق سواء عجبك أو ما عجبكش و الا خلاص نزعت عنهم كلهم الجنسية ؟ ... صعب جداً ان الناس تعيش فترة التاريخ فيها بيتكتب مع كل الرعب و الهلع و عدم الأستقرار و حكاية منصة الجمعة اللى فاتت .... و الا انت هتحجر على الناس تحس بأيه كمان بعد ما وصفتهم بانهم شِلَت !! و على فكرة برضه المصريين مش شِلَت و مش كل واحد مسكله يافطة نص ساعة ييجى يتنطط على "الشعب المصرى" لما هم ناس نكرة و مالهومش حق التعبير عن الرأي نزلت عملت ثورة عشانهم ليه ؟ و الا دي كانت عشان ناس تانيين أو حاجات احنا المصريين ما نفهمهاش ؟

عموما عملاً بمبدأ الشأن الداخلى .... خليك فى حالك و عبًر عن رأيك بأدب .... و بلاش أم النفخة بتاعة اللى جاب الديب من ديله و الا خد اللي كانوا معاك "أو اللي انت ماكنتش معاهم معرفش" و اعملوا لكم دولة بعيد عن المصريين الكُخٍين الوحشين اللى صدقوا انكم عايزين حرية و ديمقراطية لكل الناس مش ليكوا بس 

و فى الآخر اياك تفكر انك تقدر تخدع كل الناس كل الوقت .... و اياك تفكر ان المصريين أغبياء أو مالهومش لسان ... و بجد هتخسر كتير لما تتعالى على شعب زي المصريين .... تبقى حلو و مؤدب نسمع لك و نتناقش معاك بس لمصلحة مصر .... تقول علينا شِلَت و حزب كنبة و تتعالى علينا و تتفرد و تِتٍني ..... نعرف نعرًفك مقامك و بالذوء مش بالعافية

الشعب اللى انت اتكلمت و ناديت و صرخت باسمه و جاى تِتًنٍك عليه الوقتى يعرف ازاي يخليك عمرك لا تتكلم باسمه و لا باسم أى حد تاني و طالما مش عاجبينك روح شوفلك شعب أنضف مننا أو انزل أقف فى التحرير و اهتف "أنا" أريد تغيير الشعب .... هنلاقيها منك و الا من القذافى !! ده أيه الغُلْب ده