الحكومة الأول ولا الشعب ؟ البيضة الأول ولا الفرخة

مفيش حكومة في الدنيا تقدر تجهٍل حد عايز يتعلم .. طه حسين ما كانش برنس ولا إبن نبلاء ولا حتى مُبصر عشان يكون عميد الأدب العربي .. مصطفى كامل .. سعد زغلول .. جمال عبد الناصر .. أنور السادات .. كلهم فقراء من عامة الشعب ومن الريف والصعيد واختاروا يتعلموا .. وبعدين الإنسانية مش محتاجة تعليم .. عشان تكون انسان مش محتاج حد يعلمهالك .. وإلا ما كانش ربنا اختار أن يكون النبي محمد أُمي لا يقرأ ولا يكتب ومعجزته هي القرآن 

في الأصل كان الشعب .. في البداية كان الشعب .. مفيش حكومة وبيطلع لها شعب يا بتوع الديمقراطية .. لأن إله الديمقراطية بتاعكم بيقول إن الحكومة من اختيار الشعب وتعبير عن الشعب .. شوفوا شماعة جديدة تعلقوا عليها انهيار منظومة القيم والضمير والأخلاق في مصر غير الحكام .. وإلا فجمال عبد الناصر هو أول متهم  بغسل دماغ الناس وزرع فكرة الكسل والتواكل وتوزيع الفقر والدولة هي بابا وماما وأنور وجدي .. هو من زرع الفاشية ولغى الفردية 

الشعوب المتقدمة تقدمت لأنها شعوب عايزة تنافس على الزعامة .. شعب كل أفراده في حالة منافسة كل فرد بيتنافس من أجل نفسه وإدارة تعكس طموح الشعب ورغبته .. تقدمت لأنها بحثت عن المنافسة الفردية وركزت على الإنسان الفرد .. اتعلمت من أول منافسات في التاريخ .. اتعلمت من الألعاب الأوليمبية اللي فيها بيتنافس المتسابقين على لقب الأعلى والأقوى والأسرع 

اللي عايز ثورة يثور على الشعب .. على واقع الشعب واختيارات الشعب .. الشعب المصري محتاج علماء اجتماع وعلماء نفس يدرسوه كويس ويقولولنا إيه اللي حصل من بعد فترة التنوير من وقت محمد علي باشا ولحد آخر الستينات .. ليه الإرتداد إلى الكهف والهمجية .. وتأكدوا مفيش شعب واعي هيسمح بحكومة فاسدة أو قمعية .. مفيش شعب متحضر هيختار حكومة تربيه وتختارله أكله ولبسه ودينه وقناعاته .. المشكلة في الشعب والحل عند الشعب .. غير كده كلنا بنحارب طواحين الهوا