النفاق التعبيري

مثال بسيط بس على ان العيب عادة مش في رأس الحكم ولكن في ثقافة الشعب .. التليفزيون الاخوانجي بتاع عبمقصود غير ترتيب الكلمة وخلاها لمرسي قبل السيسي عكس اللي حصل على أرض الواقع في الفيديو المنشور من امبارح على صفحة المتحدث باسم القوات المسلحة .. في نظري ده لا يختلف في شيء عن الصورة التعبيرية الشهيرة لمبارك يتقدم الرؤساء في أهرام اسامة سرايا .. الاتنين تدليس وتزوير وتجميل وتفخيم في السلطة الحاكمة 

عادة الأمر ما بيجيش من الرئاسة ولا من الحاكم .. لا أعتقد ان تصرف سرايا كان بأمر من مبارك ولا أعتقد ان تصرف عبمقصود كان بأمر من مرسي .. هو مجرد تبرع من من الأفاقين ولاحسي جزم السلطة -أي سُلطة- في كل عصر .. وعادة ما بيكون غرض صاحب الفعل انه يخدم نفسه أكتر من انه يخدم اللي بيزوقه 

والشيء بالشيء يذكر فلا يغيب عنا ذكر ميزو ملوخية الشهير بممتاز القط ومقاله المدقع في النفاق بتاع مبارك المسكين المحروم من طشة الملوخية عشان خاطرك يا شعب يا ناكر الجميل .. وبسبب المقال الفخيم مبارك طلعت عليه ييجي مليون نكتة .. أرجع وأقول مسئولية الفرد يا شعب 

مسئولية الفرد اللي محدش بيتكلم عنها .. مسئولية الفرد اللي الكل بيطنشها .. الليبراليين بيطلبوا الحرية من الحكومة وكأن الحرية منحة واليسارجية عايزين الحكومة بابا وماما وأنور وجدي وهم قاعدين بيلعبوا صلًح والإسلامجية عايزين الحكومة تقمع الناس عشان نفسياتهم المريضة ترتاح ومركبات النقص اللي عندهم تهدا والثورجية بدل ما عايزين يسقطوا النظام الحاكم أسقطوا النظام العام ومعاه الدولة .. الكل بيتعامل على إنها حكومة وطلع لها شعب

الحقيقة هي العكس تماماً في الأصل كان الشعب وفي البداية كان الشعب ومش هزهق من إني أقولها ومش هبطل .. الشعب الواعي مش هيسمح لحد يقمعه .. الشعب المستنير مش هيسمح لحد يسرقه .. الشعب المسئول هيجيب حكومة تدير البلاد مش تربيه وتحميه وتغير للعيال وتبدرهم وتقضي على المخالف له في الرأي 

وهنا أخص أصدقائنا مُدعي الثورة .. لما تفهم مشكلة شعبك وتثور على غباوته ونفاقه وفساده وتسعى لإنك تحمله المسئولية الفردية لكل فرد منفرد هبأة أسميك ثائر .. لكن لحد النهاردة انت ثورجي .. وال "جي" إضافة للكلمات من موروثنا المستمد من اللغة التركية لأي مهنة تدل على من يمارسها زي أجزجي وقهوجي وطرشجي كده  

الثورة مش مهنة ولا هدف الثورة وسيلة لتغيير الواقع السيء الفاسد .. عرفت ليه يا عزيزي الثورجي لا أعترف باللي انت عملته على إنه ثورة !؟ .. أظن الرسالة وصلت