أنا عايزة أحارب ..... كتبت بتاريخ27-6-2011

بقالنا فترة عمالين نسمع و ابتدينا نشوف الوثائق "المُوَرٍطَة" لكل الناس اللي ما بيحبهومش الدكتور محمد البرادعي في تصدير الغاز الى اسرائيل ..... آخر اتنين عمرو موسى و عمر سليمان .... يا ترى ليه ؟

يا ترى علشان لو استبعدنا اللجان الأليكترونية من تصويت المجلس العسكري هيكون الأتنين دول الأهم عالخريطة ؟ و الا عشان ليهم شعبية في الشارع اللي فيه أعلاميين محنكين بيتجاهلوه و بيكرهوه في الثورة يوم ورا يوم على رأي سميرة سعيد ؟

عمرو موسى قالك دي عملية اغتيال سياسي و أنا هاطلب من الخارجية كل الملفات .... ماشي احنا منتظرين ....

جه النهارده الدور على عمر سليمان .... الجنرال اللي باع مبارك بعد 12 ساعة من تسليمه مهام رئيس الجمهورية و انتحر سياسياً عشان بلده ما تولعش .... و من ساعتها اختفى و قالك مش عايز أكون رئيس ... آه قالها صراحة لكريستيان أمانبور في المقابلة الشهيرة .... سمعته بودني ... لأ أنا مش عايز أكون رئيس أنا سني كبير ..... و مش هادخل في جدل الشعب ينفع ديمقراطي و لا لأ .... أصل أنا سمعتها بالانجليزي و ما احتاجتش الترجمة و اللي مهتم يا ريت يسمعها باللغة اللي اتقالت بيها و يقوللي المعنى اللي قاله يفرق ايه عن كلام البرادعي و موسى و غيرهم .......

ما علينا البرادعي مش عايز عمر سليمان رئيساً ده حقه .... ما ينتخبهوش .... ابراهيم عيسى مش عايزه يترشح أصلاً ... لأ ده مش من حقه .... ليه هو محصلش العوا و لا أبو سماعين ؟؟ .... كل مواطن مصري تنطبق عليه شروط الترشيح من حقه يترشح .... و كلام أم باتعة الداية على قناة التحرير بيخلق قرف و عِنْد في الشارع و القلم الجاي هيلسوع 

و عموماً اطمنوا الراجل مش عايز .... قرفان من شعب لا يقدر ما يصنع من أجله .... نظام السادات كده .... كان خسارة فينا فقتلناه ....

لحد الوقتي المخاطبات بتتكلم عن "النظر" .... مواعيد توقيع عقود .... سرعة الرد .... لا اتكلمت في سعر و لا ده يخص المخابرات و المخاطبات كمان بتتكلم عن اسرائيل و تركيا ... الغاز المصري بيتصدر لأسرائيل و تركيا و الأردن و أسبانيا و سوريا و يمكن غيرهم كمان .... الفكرة بس أن ليه محدش بيقول أن الغاز المُسَال مالوش علاقة بالبيوتان اللي بيتعبى في أنابيب البوتاجاز و ليه محدش بيقول أن فيه علاقات اقتصادية و تبادل تجاري مع اسرائيل بموجب كامب ديفيد من أول التمانينات و فيه مصانع في العاشر و العبور

فيها فساد ! .... أكيد فيها فساد لكن هي المشكلة في السعر و الفساد و الا المشكلة في التبادل التجاري و كامب ديفيد ؟ .... كمان ليه محدش بيقول أن التبادل التجاري لازم يكون تحت نظر المخابرات و مع أشخاص منتقين من مؤسسة الرياسة للشراكة في الأعمال لأن القانون المصري يمنع تملك الأسرائيليين داخل مصر و بالتالي لازم تضمن مين يشاركهم و أنه ما يجيش يبيع المصنع أو الأرض و يدخلنا في تحكيم دولي يعمل سابقة  و يجيبلنا نصيبة فتحي .... الرئاسة اختارت غلط ! أكيد ... حسين سالم فاسد و حرامي ! مفيش جدال لكن ده قرار سياسي مش قرار المخابرات 

المشكلة فين ؟ مش عايزين نصدر غاز ؟ ليه ؟ وقت ما ابتدى تصديره كان فائض و مش محتاجينه لانتاج كهربا .... حاليا محتاجينه ؟ معرفش أصحاب الخبرة يقولوا ... لو محتاجينه يبقى يتوقف تصديره و اللي يعوزه البيت يحرم عالجامع ... لو زيادة يبقى يتصدر بالسعر العالمي لأسرائيل زي غيرها مش بيجيب عملة صعبة ؟

المشكلة في العلاقات التجارية مع اسرائيل ؟ ده شيء متفق عليه و متوجب بناء على اتفاقية السلام و فيه دول عنترية بتاعة شعارات بتفضل تستثمر في اسرائيل أحسن ما تستثمر في مصر و من غير سلام ... تعديل الاتفاقية كان مفروض في 2009 بعد مرور 30 سنة عليها ليه ما حاولناش ناخد منها منفعة أكبر ؟ يساءل مبارك لأن برضه ده قرار سياسي .... 

اسرائيل عدو ؟ ماشي مش مختلفين ... عدو تاريخي لكن لينا معاه حدود و المجهود اللي اتعمل علشان نوصل لاتفاق كل العرب فشلوا فيه مش قليل و قصاد ده أمريكا بتدفع مساعدات خرافية .... راحت فين المساعدات ؟ الفرق بين جيش مصر سنة 79 و النهارده خرافي و اللي ما يشوفش من الغربال يقرا تقارير ال سي أي أيه

طب المساعدات المدنية راحت فين ؟ .... اتسرقت .... العصابة "المفترية في البلاطي مدارية" الحاكمة سرقتها على مدار 30 سنة .... ده ذنب أمريكا ؟ ممكن .... ذنب ضمني .... لكن مش ذنب اسرائيل و لكن بالتأكيد ذنبنا احنا ..... سكتنا ليه !! 

مش عايزين نعرف اسرائيل و مش عايزين كامب ديفيد و عايزين نحارب ؟ و ماله قرار استراتيجي مهم .... لينا فيه مصلحة ؟ و الا احنا أُجَرِيًة و مرتزقة عند العرب ؟ اللي على فكرة مش هيصرفوا على الحرب برضه .... أصلهم يا عيني ليهم علاقات و استثمارات مليارية مع اسرائيل و عايزين يحافظوا عليها .... 

عايزين نحارب ليه ؟ سينا ما شربتش دم كفاية ؟ مين يستاهل أن مصري واحد يموت تاني عشانه أو شبر أرض يضيع ؟ و محدش يقوللي المسجد الأقصى أبوس ايديكوا عشان دي جدلية عظيمة و نتايج الحرب غير مضمونة .... يعني بدل ما نرجع الأقصى ممكن نخسر القاهرة مش سينا بس .....

أنا شخصياً عايزة أحارب .... أحارب الجهل و المرض و العوز و أزرع أكلي و أصنًع هدومي و معداتي عشان أكون سيدة قراري .... ساعتها أقدر أحارب مش بس عشان الأقصى لكن عشان أرض فلسطين التاريخية من النهر الى البحر .... 

مين ضيع علينا 30 سنة يعتبروا في عمر الدول كتير ؟ 30 سنة كان ممكن نكون فيهم ألمانيا أو اليابان !!! ..... و النبي محدش يستهبل و يقوللي المخابرات .... لأ صاحب القرار السياسي المصري هو اللي اختار نظرية مش عايزين وَشْ احنا طالعين أعارة و جايين نسترزق .... شوية مع الوهابيين و غزوهم اللا فكري و شوية مع الأمريكان بتوع مصلحتي و أنت اتحرق  

ما ينفعش نلوم دول بتدور على مصلحتها عشان احنا عالم خِرْعة مش عايزة لا تفكر و لا تشتغل !! و شعارات عبد الناصر تشتغل و الحكومة هتعلمني و تعالجني و تأكلني و توظفني و تجوزني و تسكني ..... و مش بعيد تفليني كمان .... 

أفضل شيء كان ممكن يحصل لمصر في العصر الحديث هي ثورة يناير اللي هدت نظام فاشل أجوف عامل زي عصا النبي سليمان "مع الفارق طبعا" .... يا ترى هنفوق و الا هترجع مصر لعادتها القديمة ؟

يا ريت نسمي الأشياء بمسمياتها و نقرا التاريخ بموضوعية "مش التاريخ اللي كتبه هيكل" و أمثاله من المزورين  و المسلاتية ..... 

النبي نفوق و نشتغل و نصلًح الله يكرمكوا عشان أنا عايزة أحارب

ارهاصات استفتائية .... كتبت بتاريخ 11-6-2011

الأستفتاء كان بنعم على العمل بدستور 71 مع تعديل 8 من مواده و الغاء مادة ..... هو فين دستور 71 ؟ هل مصر الآن خاضعة لدستور 71 أم أعلان دستوري من 68 مادة !! و قبل الأستفتاء أعلن المجلس العسكري أنه في حالة التصويت بنعم سيتم تعديل دستور 71 و العمل به حتى انتخاب برلمان و رئيس "ربما" يقرران كتابة دستور جديد للبلاد .... و في حالة التصويت بلا سيتم العمل بأعلان دستوري مؤقت حتى كتابة دستور جديد .... احنا فين الوقتي ؟ التصويت كان بنعم لكن المجلس العسكري اختار مسار لأ مع خلطه خلطاً خزعبليا بمسار نعم    

المادة رقم 189 و 189 مكرر في الأستفتاء على دستور 71 تتكلمان عن برلمان و رئيس يجتمع الأعضاء المنتخبين من البرلمانين "شعب و شورى" مع الرئيس للدعوة لكتابة دستور جديد اذا وافق ثلثي الأعضاء المنتخبين و هكذا تختلفان تماما عن المادة 60 في الأعلان الدستوري اللتي أغفلت المادة 189 و احتفظت فقط بالمادة 189 مكرر اللتى تعتمد عليها و هو عك قانوني حيث ألغت وجود الرئيس و جعلت البرلمان "منفرداً" هو صاحب القرار في اختيار اللجنة التأسيسية و اقرار كتابة دستور من عدمه بما يتنافي مع العدالة في نظام الأنتخاب على مرتين لأنه بما أن الشعب مصدر السلطات فلماذا لا ينتخب الشعب اللجنة التأسيسية بل ينتخب من يختارها أو ينتخبها بالنيابة عنه !! و يتنافى كذلك مع مبدأ تضارب المصالح اذ كيف يكتب البرلمان دستوراً يحدد صلاحياته و كيفية الرقابة عليه و الجهات اللتي تنظر في الطعون على عضوية أعضائه أو رفع الحصانة عنهم .... و كيف يحدد البرلمان صلاحيات الرئيس ؟ من المنطقي أنه سيجعل كل الصلاحيات له فقط و بالتالي ينتج عنه رئيس شخشيخة أو بهلوان بلا صلاحيات و هو ما يتناقض مع الرغبة الشعبية ..... و كيف يصنع البرلمان كل أطر الرقابة على السلطات الأخرى من قضائية و تنفيذية !! فمنطقي أن يضعها كلها بيده و هو ما يتنافي مع الديمقراطية القائمة على تعدد و استقلال السلطات ..... اذ كيف يصبح البرلمان أقوى من السلطة القضائية اللتى لابد أن تكون هي الحكم في شرعيته و شرعية العضوية لأعضائه !!    

من كوًن لجنة لتعديل الدستور مبدئياً كان مبارك بترحيب من الأخوان فقط .... ثم سيادته أسقط الدستور بتسليمه ادارة البلاد الى المجلس العسكري بمخالفة الدستور الذي ينص على تسليم ادارة البلاد لرئيس مجلس الشعب "كما حدث بعد اغتيال السادات" اذا كان المجلس منعقداً أو لو كان المجلس منحلاً يتم تسليم أدارة البلاد الى رئيس المحكمة الدستورية العليا .... ثم أسقط المجلس العسكري الدستور مرة أخرى بحله لمجلسي الشعب و الشورى بمخالفة الدستور الذي يمنع السلطة المؤقتة من تعطيل الدستور أو حل البرلمان .... بل و عطل العمل بالدستور تماما في بيانه رقم 3 يوم تنحي مبارك .... فلماذا اذاً يعدل دستوراً قد عطله !! ناهيك عن أن أي ثورة على نظام حاكم هي ثورة على النظام و دستوره و بما أن ثورة 25 يناير أسقطت النظام الحاكم فقد أسقطته مع دستوره الذي يعتبر مانيفستو حكمه

من مصلحة كل القوى السياسية و خاصة اللتي تدعي أغلبية ساحقة كتابة دستور قبل الأنتخابات البرلمانية لأنه بعد كتابة الدستور لابد من حل البرلمان و الدعوة لأنتخاب برلمان جديد "في حال قبل الشعب بالدستور الذي سيكتب" و بذلك ستضيع أموالهم و دعاياتهم على أقصر برلمان في التاريخ .... بينما لو أجتمعوا مع القوى السياسية الأخرى على كتابة دستور أولا فستكون رسالة تطمين للشعب بأنهم جزء أصيل منه لا يسعون الى نصب أي فخ لهذا الشعب مما يمكن لهم القفز على السلطة الى الأبد و الغاء كل أحلام الديمقراطية و الكرامة بل سيكون انتخابهم بعد كتابة الدستور انتخاباً سليماً لا يمكن الطعن عليه ..... ناهيك عن درء الشبهات عنهم بأنهم لا يعلنون عن نواياهم في كتابة دستور دولة التمكين و اعلان الخلافة و تملك الأرض و من عليها و أنهم قادمين لسرقة ثورة الشعب و تحويلها الى مغانم مع توعدهم لأصحاب الأفكار المختلفة من اليساريين و الليبراليين أصحاب الفكر العلماني "اللي مش عدو الدين و المصحف" الداعي لفصل الدين عن الدولة أي عدم حشر الدين في تسيير أمور الدولة و عدم الأتجار به لهزيمة الأعداء" توعدهم بالويل و الثبور و عظائم الأمور

مصر على مفترق طرق من سكة السلامة و سكة الندامة و سكة اللي يروح ما يرجعش "و حقيقة أنا مش عارفة الفرق بين الاتنين الأخرانيين سوى أنهم سكة رايحة أجيب أومو و سكة رايحة أجيب طابع بوسطة" .... و بما أن شباب التحرير لا يفقهون الألف من رجل البنطلون في السياسة و الشعب بيكرههم عمى و حسبانهم على الليبراليين هيودي الليبراليين ورا الشمس .... و بما أننا منذ اللقاء المسرحي لل 300 أئتلاف فاشي و المجلس العسكري في حالة من الهدوء الذي يسبق العاصفة ..... فواضح أن الرز بيتفلفل على نار هادية و النتيجة هتكون شيلني و أشيلك ..... و أنا شخصياً رايحة أجدد الباسبور

على ماذا كان الأستفتاء !؟!؟ .... كتبت بتاريخ 20-3-2011

الأستفتاء لم يكن أبدا بالأمس على مواد الدستور الثمانية ... كانت عملية تفنيط للقوى السياسية على الأرض ذكية للغاية ... الأخوان برشطوا كالعادة على شباب الثورة و باعوهم بسرعة أمام أغراء السطوة و النفوذ و المكسب السريع كما فعلوا مع ناصر و السادات من قبل و الآن يفعلونها مع شباب 25 يناير و البرادعي .... استخدموهم لمصلحتهم و لما أدوا الغرض ... بخ ... الأخوان و السلفيين فى حالة سَرْعَة غير طبيعية على جني المكاسب ....

الأستفتاء بالأمس كان علي من هو الأقوى ؟ الأخوان أو الليبراليين؟ المسلمين أو المسيحيين ؟ الجيش أو الثورة ؟ الشعب أو شباب التحرير ؟

من قال لا 3 مجموعات ... شباب التحرير, الليبراليين الباحثين عن الدولة المدنية, و المسيحيين ضد حشد السلف و الأخوان .....

من قالوا نعم أيضا 3 مجموعات .... الأخوان و السلف و من تأثر بدعاياتهم "نعم مع الله, و الواجب الشرعي و حماية المادة 2 الغير مستفتى عليها أصلاً و البتنجان",و من يريدون الأستقرار و دعم الجيش و دفع عجلة الأقتصاد و سرعة عودة الأمن المفقود, و حزب الكنبة و هم المجموعة الأكبر و المجموعة الغالبة كما أرى اليوم في الشارع المصري "و أنا عملي في الشارع طول النهار و يجعلني أتحدث الى كل الطبقات" ...

ببساطة الغالبية العظمى من الشعب اختارت أن تتحدى من همًشَها و خوًنَها و اتهمها بالخنوع و لم يقدر ماحدث لها و ما فُعِلَ بها أثناء الأسبوع الأول من الثورة .... تحدت من تعالى عليها و قال عنها حزب الكنبة .... اختارت أن لا يصنع القرار السياسي في ميدان التحرير و أن تتحرر من فوقية و علوية ميدان التحرير "و أسيادنا اللي في التحرير" و انفرادهم بتقرير مصير شعب عظيم و أمة حية لم يلتفتوا اليها و تباروا في نعتها بأشنع النعوت .....

الثورات يقوم بها دائما أقل من 5% من الشعب و لكنها لا تنجح و لا تصبح شرعية الا أخذت شرعيتها من الشعب و الشعب المصري لن يشرب مقلب جمال عبد الناصر الذي أدى الى مبارك مرة ثانية ... و هو ما تجاهله شباب التحرير "و أنا لست ضدهم على الأطلاق" و هذا لأنهم مسيًسين و ليسوا سياسيين .... لم ينتبهوا أن جمهورهم و زبائنهم هم الشعب المُرَوًع و الغير آمن و الموقوف الحال ...

و لم ينتبهوا أن لغتهم الفوقية لم و لن تصنع منهم أبطال ... و لم ينتبهوا أن الأشياء ان زادت عن حدها انقلبت لضدها ... و لم ينتبهوا أن الجمع اللا منتهية و الضغط على الشعب في رزقه و أمنه بتكوين هذه الكتلة الحرجة دائما في ميدان التحرير ستجعله نفسياً يرفض ميدان التحرير ..... لم ينتبهوا أن المصريين هم أذكى شعوب الأرض على بساطتهم و هم أكثر شعوب الأرض احساساً بكرامتهم و أنهم يصبرون على المهانة مكرهين و لكن عند الرد هم الفراعين ....

لم ينتبهوا أن الشعب يستطيع أن يستعمل الصندوق كما يريد لأسقاط من يريد حتى لو كان هو من أوصله الى هذا الصندوق .... درس عظيم من أمة عظيمة حية ..... درس للنخبة و تعبير عن أن هذه النخبة فاشلة و ليست لها قاعدة شعبية و لا تأثير ... و هي خسارة كبيرة للوطن و لكنها الحقيقة فالتنظير في الفضائيات و الأستعلاء على الناس لا يمكن أن يجعل هؤلاء الناس يشعرون بالانتماء لهذه النخبة ...

الدرس واضح و صريح أتمنى أن تراه النخبة المثقفة في مصر و أن تنزل من عليائها الى الشارع و تقترب من الناس أكثر فهو واجبها الوطني و المجد لا تصنعه النخب و لكن تصنعه الشعوب ....

أتمنى أن يستفيق شباب 25 يناير و يغيروا من أسلوبهم الفوقي المُخَوٍن للشعب على طريقة "أنت معانا و الا مع مبارك" و يستمعوا أكثر و ينظموا صفوفهم أكثر و يتعلموا السياسة بحرفية و ليس بعنطظة .... و أن يعرفوا أنهم لا يستطيعوا انتزاع الشرعية بميدان التحرير بعد ذلك ... و انما الشرعية من الصندوق ... فالشعب صوت ضد ميدان التحرير و سلطة ميدان التحرير ... الشعب يريد الأمن و الأقتصاد و دولة القانون اللتي لا تُهان هيبتها و لا يصنع قرارها في الشوارع و الميادين انما على يد أهل الثقة و المؤتمنين ....

كل هذا كنت أراه من يوم حزب الكنبة و حتى الأمس و كان اختياري "لا" لأن أسباب ال لا عندي كانت أكثر من أسباب ال نعم و لأن مصر فوق الجميع و مع ذلك أحترم قرار أغلبية الشعب و أقدره و أتفهمه و أعلم لماذا اتخذه و لماذا مصر ستكون دائما في أمان طالما علم السياسيون أو من يدًعون السياسة قيمة هذا الشعب ....

لك الله يا مصر و سلاماً يا بلادي ......

رسالة الى "اللى مش حزب الكنبة" يعنى المصريين اللى مش شِلَت .... كتبت بتاريخ 24-2-2011

 اللى يقول لكم أنتم حزب الكنبة و شِلَت ردوا عليه و قولوا له أنت جاهل لأنك ببساطة معندكش أى فكرة احنا اتعمل فينا ايه و شوفنا ايه و استحملنا ايه .... و كمان مره جاهل عشان بتعمم على 80-85 مليون بنى آدم جوة و برة مصر

أصلي قريت نوت لطيفة كده و عنوانها ملفت ... اللى كاتبها عاوز يقول للشعب المصرى اتنيٍل و سد بقك ... هو أنت لا منك و لا كفاية شرك !! و الا أنت صدقت صحيح حكاية حرية و ديمقراطية للجميع ؟؟؟ لأ و ايه أسلوب متعجرف و تِنِك و لا جمال مبارك فى زمانه

المهم .... ماسكة نفسى و كاتمة بقى و عمالة أقول اللهم طولٍك يا روح .... بس الصراحة و بعد الفوضى المزرية اللى وصلنالها فعلا مش قادرة أسكت ..... و خلاص بقى هقول اللى عاوزة أقوله و رزقى على الله ... كده كده هاتشتم و كده كده الأيام السودة بدأت و أخرتي فى سجن مؤبد من بتوع الأخوان اللى تحت الأنشاء الوقتي لو مالحقتش ألٍم عزالي أو أتنكر فى صورة زجاجة

أنا بس عاوزة أفك عن نفسى لحسن أطق ..... وهأوجه كلامى للأستاذ المحترم ديك البرابر و أول شىء لازم يذكر هو بيت للشاعر أبو الأسود الدؤلى بيقول فيه ......

لا تنهى عن فعل و تأتيَ مثلهُ ..... عارٌ عليكَ اذا فعلتَ عظيمُ

 أنت مين عشان تعرًف و تصنًف شباب 25 يناير و اللى معاهم و اللى مش معاهم .... ما تسيب التاريخ هو اللى يقرر و الا ده احتكرته هو كمان ؟ عمري ماحسيت اننا محتاجين قانون ضد الأحتكار زي النهارده .... لأ و كمان محتاجين قانون ضد الأحتقار

مين وائل غنيم ؟ مش شغلك .... وائل غنيم شخصية غامضة ظهرت يوم 8 فبراير بالليل بعد ما كان المولد قرب ينفض فى عربية الدكتور حسام بدراوى .... اتنسب له ايه ! و هو ادعى ايه ! و نفى ايه ! مش مشكلة أبونا الوقتي ... الأيام هى اللى هتقول لنا مين هو وائل غنيم ... يستحق احترامنا و الا لأ .... زيه زى أى شخصية "عامة" بيختلف عليها الناس

أنت جاهل كمان مرة عشان ماتعرفش مين حسنين هيكل .... حسنين هيكل بتاع "البؤر" خلٍيه يحكيلنا و هو شاهد على العصر و أكبر مسلاتى فى العصر الحديث قضى عمره يمجد للديكتاتورية و حكم الفرد .... خليه يحكيلنا "الزعيم الخالد" جمال عبد الناصر عمل ايه فى الرئيس محمد نجيب ؟؟؟ و عمل ايه مع السنهورى باشا فقيه الفقهاء القانونيين و صاحب دستور 1954 ؟؟؟؟؟ و هو شخصياً "هيكل بيه" عمل ايه فى مظاهرات الطلبة 1971 اللى كانت لمطالبة السادات باتخاذ موقف و اعلان الحرب ؟؟ و طردهم ليه لما راحوله الأهرام اللى كان ماسكها فى الوقت ده و جابلهم البوليس ؟؟؟؟؟ و بما أنه أكبر عدو للفساد ممكن يحكيلنا شوية عن البيزنس بين ابنه "أحد الأغنياء فى العالم على قوائم فوربس" و بين هيرمس "و كلنا عارفين علاقة هيرمس بجمال مبارك" .... و الا ما يرضاش ؟

انت عبيط لو خلطت بين معرفة الناس لمسئولية مبارك عن 30 سنة هم و غم وبين الأصل الطيب اللى بيرفض التمثيل بأعدائه .... و بعدين مش انت راجل ديمقراطى !!!! لأ واضح فعلا انك راجل ديمقراطى ..... أوي صراحة

الأخوان .... و ما أدراك ما الأخوان ..... مش عايز الناس تخاف من الأخوان ؟ طب انت تعرف ايه عن الأخوان ؟ بيتهيألى لو تعرف أى حاجة عنهم و بتدعي لنفسك الدفاع عن الحرية كان زمانك مسروع منهم أكتر ما أنت مسروع من اسرائيل .... بتقول الفيصل الأنتخابات ! أنا معاك ... بس كمان ماتنساش انهم الفئة الوحيدة "تقريبا" حالياً اللى معاها فلوس زي الرز و تعرف كويس تجيٍش فى الأرياف زى ما الحزب الوطنى كان بيعمل تمام و مش هقول أكتر من كده

حَمٍل مبارك ذنب 30 سنة بس ماتحمٍلوش ذنب 60 سنة و ماتنساش ان الفساد و المعتقلات و مراكز القوى من قبله بكتير .... صحيح هو خربها و جابها أرض بس هو كمان مش جاى من هونولولو ... الفساد فى مصر من تحت لفوق و من فوق لتحت من قبل ما هو يحط رجله فيها و ده برضه ما ينفيش مسؤليته .... مش عايزين مبارك و لا أى حاجة من ريحة مبارك ... خلاص ارتحت !!!

و الغريبة يا أخي أن أعلى الأصوات و أسلط الألسنة هى للي كانوا أكثر المنتفعين من نظام مبارك و الحزب الوطني ... اللى اتعلموا بالكوسة و اتعينوا بالكوسة و اشتروا شاليهات فى مارينا برضه بالكوسة و غيره و غيره و تلاقى الواحد فيهم كل ما عام أكتر فى صلصة الكوسة كل ما عمل فيها عنتر و طَوٍل لسانه على الناس اللى كِفْرِت في عيشتها في عهد مبارك

الثورة المضادة .... شيء طبيعي انها تحصل ... أمال عايز البلاوي اللي كانوا موجودين يسيبوهالك كده بالساهل ؟ لو واثق من أسس ثورتك و الأسباب اللى أدت اليها و الناس اللى اتسحلت و ماتت و الناس اللى اتربالها الرعب ما تخافش أوي كده من الثورة المضادة .... بس و النبي بلاش النظرة الفوقية لعامة المصريين و بلاش أسلوب الجزيرة في احباط الناس و تدمير معنوياتهم .... مفيش مصري أهبل يا عم الحاج و بعدين بلاش رمي البلا على كل من هب و دب وكأن كل اللى كانوا موجودين فى مصر خلال ال60 سنة اللى فاتوا كلهم خونة و انت بس اللى طاهر و عمرك ما جبت واسطة من الحزب الوطنى .... و الا انت ماكنتش عايش في مصر أصلا !!!!

موضوع نخاف من اسرائيل ده مشككنى انك أصلا عندك أى فكرة عن ثقافة المصريين بعد 73 و موضوع الغاز ماتديهوش أكبر من حقه .... بيزنس .... صحيح بيزنس فاجر .... بس فى الآخر بيزنس و أهو كله قدام النائب العام و كتير ورا القضبان و لو شاطر قدم بلاغ و هات اللى عمل الصفقة دى و حاسبه ... انما محسسني ان المصريين كلهم عملاء لأسرائيل و انت بس اللى وطني !!!! يا خيٍ

ايران مش عدو ؟؟؟؟ انت جاى منين ؟؟ ايه !! معلوماتك كلها من الجزيرة ؟؟ يا راجل يا أمير ما تقرا التاريخ .... اقرا بس عشان أنا معنديش خُلق أقعد أفهٍم فى واحد كل معلوماته كومبو و تيك أواى

حلو أوى انك فاهم العلمانية بس أوعى تتخيل ان باقى المصريين حمير و مابيفهموش .... مش كل المصريين عايشين على الكوبى بيست ..... و بعدين ازاى حرية و عدالة اجتماعية و علمانية و بتمجد فى الأخوان ؟ انت عمرك ما دخلت نقابة فى مصر ؟؟؟ خدلك لفة فى النقابات المتأخونة و بعدين ابقى قوللى رأيك

المصريين اللى حاسين بالقلق على بلدهم وولادهم و مستقبلهم عندهم حق سواء عجبك أو ما عجبكش و الا خلاص نزعت عنهم كلهم الجنسية ؟ ... صعب جداً ان الناس تعيش فترة التاريخ فيها بيتكتب مع كل الرعب و الهلع و عدم الأستقرار و حكاية منصة الجمعة اللى فاتت .... و الا انت هتحجر على الناس تحس بأيه كمان بعد ما وصفتهم بانهم شِلَت !! و على فكرة برضه المصريين مش شِلَت و مش كل واحد مسكله يافطة نص ساعة ييجى يتنطط على "الشعب المصرى" لما هم ناس نكرة و مالهومش حق التعبير عن الرأي نزلت عملت ثورة عشانهم ليه ؟ و الا دي كانت عشان ناس تانيين أو حاجات احنا المصريين ما نفهمهاش ؟

عموما عملاً بمبدأ الشأن الداخلى .... خليك فى حالك و عبًر عن رأيك بأدب .... و بلاش أم النفخة بتاعة اللى جاب الديب من ديله و الا خد اللي كانوا معاك "أو اللي انت ماكنتش معاهم معرفش" و اعملوا لكم دولة بعيد عن المصريين الكُخٍين الوحشين اللى صدقوا انكم عايزين حرية و ديمقراطية لكل الناس مش ليكوا بس 

و فى الآخر اياك تفكر انك تقدر تخدع كل الناس كل الوقت .... و اياك تفكر ان المصريين أغبياء أو مالهومش لسان ... و بجد هتخسر كتير لما تتعالى على شعب زي المصريين .... تبقى حلو و مؤدب نسمع لك و نتناقش معاك بس لمصلحة مصر .... تقول علينا شِلَت و حزب كنبة و تتعالى علينا و تتفرد و تِتٍني ..... نعرف نعرًفك مقامك و بالذوء مش بالعافية

الشعب اللى انت اتكلمت و ناديت و صرخت باسمه و جاى تِتًنٍك عليه الوقتى يعرف ازاي يخليك عمرك لا تتكلم باسمه و لا باسم أى حد تاني و طالما مش عاجبينك روح شوفلك شعب أنضف مننا أو انزل أقف فى التحرير و اهتف "أنا" أريد تغيير الشعب .... هنلاقيها منك و الا من القذافى !! ده أيه الغُلْب ده

خمسة نصائح عند تجديد رخصة عربيتك ..... كتبت بتاريخ 1-8-2009

اذا انتهت رخصة العربية وحان الميعاد المشئوم لتجديدها, واذا كانت الرخصة مُصدرة من مرور الهرم فأنت فى حاجة الى قراءة هذه السطور "وبشدة" ...... ولو لم تقرأها فلا تلومًن الا نفسك !!!!

1-  لابد من أن تعرف أن العملية المستعصية ستستهلك من يومين الى ثلاثة ....فانفض عنك الملل والزهق وخد أجازة طويلة فحتما ستحتاج الى نقاهة بعد الانتهاء "دا لو انتهيت أصلا"

2- ابدأ بشهادة المخالفات و اذهب مبتسماً وخد حبايتين زاناكس 0.5 مجم و 3 زجاجات مياه مثلجة و شوية سندوتشات ... فربما يطول اليوم أو تجد نفسك محبوساً خلف الجدار البشرى بلا هروب .....

يومك لابد من أن يبدأ فى السابعة والنصف صباحاً حتى تجد مكانا تتذنب فيه ..... ولو تقدر تبات من بالليل أمام الباب يكون أحسن برضه ...
اذا كنت مضطرا لارتداء رقبة أو حزام للظهر أو تمسك بعكاز فلا تتصور أن هذه العلامات ستعفيك من البهدلة ..... ويا حبذا لو استبدلتهم بسترة واقية من الرصاص .....
لا تعترض ..... هى كلمة السر, ادفع وانت ساكت, دا لو ربنا وفقك أصلاً و سمعت اسمك و عرفت تخترق الموجات المتدافعة من الشعب المطحون "الله يطحنه زيادة إن شاء الله" ووصلت وسلمت رخصتك .....لابد من الانتظار ساعة حتى تعرف إذا كان عليك مخالفات أو لأ...... وبعد الدفع لابد من الانتظار حوالى ساعتين حتى تستلم شهادة براءة الذمة من عديمى الذمة .... خد بالك انت بتدفع من غير ما تعرف ليه ولا كام مخالفة ولا فين ومحدش يتفلسف ويقوللى موجودة عالنت ... الموقع مغلق بسبب تحديث اللوحات الجديدة اللى بالى بالكم

ملحوظة : حذارى من ارتداء أى كمامة حتى فى موسم انفلونزا الخنازير و عليك باحتمال الروائح الكريهة واحتمال الأصابة بجميع الأوبئة وإلا .... سيُنظر لك على إنك كائن فضائى ولن يسمح لك بالجلوس حتى على السلم ....

وبعد إنتهاء اليوم المرير ..... روًح وحاول تنسى .... واللى هيسألنى ليه اليوم انتهى والمرور شغال لحد الساعة 4 فالإجابة بسيطه .... الخزينة تغلق الساعة 1 و بالتالى ......روًح !!!!

3-  فى اليوم التالى عليك الإلتزام بالطابور وحتى لو كان طوله 2كم .... ولا تعترض على الموظف لو قام نص ساعة يخلص ورق الناس أصحاب الواسطة أو راح يشرب شاى ..... ماهو بنى آدم برضه, وعند الوصول الميمون الى الشباك عليك ان تهين قرشك ولا تهين نفسك ..... ويا ريت تاخد كورس فى لغة الإشارة قبل ما تروح عشان تفهم الغمزات وتقدر تستوعب هل المعلوم كفاية وإلا عاوزين كمان ....

ملحوظة: للأخوات الفاضلات .... حتى لو كنتى بنت ناس وشيك ومتربية .... حاولى تروحى لابسة أسوأ شىء فى الدولاب ....ولا أقولك ..... استلفى هدوم من مرات البواب ..... صحيح كل الستات اللى واقفين فى الطابور أكيد عندهم عربيات والا جايين هنا ليه ..... بس برضه الحرص واجب حتى تتجنبى كوعين أو كتفين على الماشى .... واذا لم تكونى من مرتدى القبة ولا الطاسة ولا الحلة فتحملى النظرات وانتى اللى جبتيه لنفسك ..... و النظرات هنا مش نظرات رجالى والله دى نظرات حريمى كلها كره وبغض .... وخاصة لو كان اسمك فيه محمد أو أحمد ومش لابسة خيمة ..... وحاولى تجاهل التعليقات والهمهمات بأنك كافرة ورايحة جهنم حدف وان أقل واحدة فيهم جزمتها ولا مؤاخذة برقبة ميت واحدة زيي و زيك ... و نصيحة لا تحاولى الرد أوالجدال فى مجتمع الطابور والا مش هيحصل طيب وفى نفس الوقت لا تحاولى التودد لأي منهن والا ستكونى قد أدخلتى نفسك فى دائرة اشباع النقص وعقد الدونية الموجودة عند الكل فى مجتمع الطابور .... وقد أعذر من أنذر

4-  لا تحاول الجدل فى أية مدفوعات .... ادفع وانت ساكت واشكر البيه الموظف أو الهانم الموظفة "حتى لو كان شكلها خدامة" و احمد ربنا ..... مع العلم انه زيادة فى التنكيل بك سيرسلك الى الخزينة 3 أو 4 مرات وفى كل مرة عند العودة لابد من الوقوف فى الطابور من أول وجديد

ملحوظه: حذارى من سؤال الموظف عن مدلول الحروف فى اللوحات الجديدة لأنه مايعرفش وهيفكر انك بتستفزه ولا سمح الله ممكن يشتمك ..... ولو نمرة عربيتك الجديدة فيها "ج ع" أو "ط ز" أو "ه ع" .... احمد ربنا و امشى وانت ساكت

5-  لابد من مراجعة الرخصة بعد استلامها ولو لقيت الاسم أو لون العربية غلط مثلا مفيش مشكلة .....روح للبيه الموظف تانى هيبهدلك شوية ويقل أدبه عليك وبعدين هيدفعك 10 جنيه لتصليح الخطأ (خطأه هو طبعا) و بعدين هيلطعك ساعة ونص عشان تحرًم وبعدين هيديك رخصة جديدة فيها العنوان غلط ..... خدها واحمد ربنا برضه واعتبر انك اتولدت من جديد وان دا يوم عيد ميلادك وروًح بيتكو و وزًع شربات .....

وعلى فكرة لو عندك واسطة حتى لو كانت حظًابط النوباتشى أبو نجمة واحدة فأنت ماكنتش محتاج تقرأ الصفحة السابقة .......

مع تحياتى ...... خواجاية من المحروسة

بين اللي فات و اللي جاي ... أديني ودنك

عارفين مصر مشكلتها أيه ؟ .....
مشكلتها أنها بلد يعشق ماضيه حتى و لو لم يفهمه .... يعني حتى أكتشاف حجر رشيد الكل كان مغرم برسومات الفراعنة على الحيطان و لكن مش فاهم دي أيه ... يا ترى لغة و الا دول كانوا ناس طفوليين عندهم ثقافة مقدسة أسمها الرسم على الحيطة !! و على فكرة أول امبارح كان الذكري ال 212 لأكتشاف حجر رشيد "19 يوليو 1799" حد خد باله ؟

و حتى بعد ما الأخ شامبليون فك طلاسمه سنة 1822 "لأن كان عليه مرسوم حكومي ب3 لغات ... هيروغليفية - قبطية - أغريقية فأصبحت طلاسم المصريين شفرة ممكن حلها" .... المهم شامبليون فتح الباب على أم الحضارات لأم الدنيا و أول دولة عرفها التاريخ ... حد ابتدا يقرا المصريين كتبوا أيه عن نفسهم ؟ حد قرا كتاب الموتى مثلا !! ماعتقدش أن كتير قروه و لا اهتموا حتى يسمعوا عنه .... كل اللي حصل هو اختصار كل حكام مصر العظام في فرعون موسى "اللي بالمناسبة مش مؤكد اذا كان رمسيس التاني أو لأ" و بدأ كل معتنقوا الديانات السماوية في صب جام غضبهم على الفراعنة .... الطغاة الكفرة الجبابرة المفتريين .... 

و نسيوا فرعون أبراهيم و هو من زوجه بهاجر أم اسماعيل و لولاها و لولا هذا الفرعون ما كان العرب .... نسيوا فرعون يوسف اللي أنقذه من غياهب السجون و وثق فيه و قربه حتى أصبح عزيز مصر "رئيس وزراءها يعني" و يوسف لم يكن في الأصل مصريأ أصلا .... يعني الراجل الفرعون المحترم ده فضل الأمانة و الكفاءة على أنه ينظر لأصل النبي يوسف أيه .....

نسيوا أن أول نبي بعد آدم و قبل نوح هو أدريس "أخنوخ" و أن اختلف العالم أين ولد فقد عاش في مصر و تمصر أو كان مصرياً على كل حال ...... نسيوا أيوب المصري و الخضر رفيق موسى نسيوا دعوة الفرعون اخناتون لعبادة الواحد الأحد ..... ما هم فراعنة برضه و الا أيه ؟

ثم بدأ الغزو العربي "آه غزو معلش و مش عشان نشر الدين لكن عشان نشر ثقافة بدو الجزيرة و اكتساب أرض لدولة جديدة و توسع في السيطرة" و بدأت حركة العداء لكل ما هو مصري فرعوني و أصبح كتير من المصريين يستنكر أن يقال عنه فرعوني و يقولك لااااا أنا عربي !! 

يعني بالعقل كده دولة هي أول دولة في التاريخ عمرها 7000 سنة من التاريخ المكتوب و الله أعلم قبل الكتابة كام ألف سنة كمان و مساحتها شاسعة "كانت أرض مصر وقتها توصل لحد جنوب السودان و نص ليبيا" يا ترى لما دخلها العرب كان عدد سكانها كام ؟ 3 ملايين ! 5 مليون ! 2 مليون ! "الكلام ده كان من 1371 سنة بالظبط سنة 640 م" العرب بقى اللي كانوا بدو رحل في الجزيرة العربية كلهم على بعض كده كام ؟ و لما جيش دخل و فتح مصر و استوطن و بعتوا جابوا قرايبهم و أصحابهم كمان .... لا يمكن يكونوا رموا سكان مصر اللي بالملايين و قعدوا مطرحهم ؟ المصريين خدوا 300 سنة تقريبا ليقتنعوا بالدين الجديد و يصبح أكثر من نصف عددهم من المسلمين .... يعني كان فيه مصريين اهوه في مصر لما غزوها العرب !! مصريين فراعنة يعني .... احتووا محتليهم من هكسوس و فرس و يونان و رومان و فضلوا قاعدين برضه و بالتأكيد استوعبوا محتليهم الجدد من العرب و بما أن الناس على دين ملوكهم خدوها تاتا تاتا و ناسبوهم و اختلط دمهم ببعض .... بس برضه الأصل مصري .... المخلوق الفرعوني لم يختفي و لا ينقرض و لا العرب رموه في البحر و استوطنوا مكانه .... ليه بقى بنقول فراعنة و احنا مش مقتنعين و ليه بنقول عرب و احنا مش متأكدين !!

عشان ببساطة كلمة "فراعنة" مرتبطة بالجبروت و البطش .... و عند ناس تانية مرتبطة بالدولة المركزية المنظمة و عزة النفس و الكرامة و النبوغ و الحضارة .... المهم كل واحد يختار الوش الفرعوني اللي يعجبه مش هيغير من الحقيقة حاجة .... المصريين بيسمعوا عن تاريخهم و أصلهم و بيصدقوا أعداءهم و أصدقاءهم على السواء في أي كلام فارغ يتقال محدش عايز يوجع دماغه و يعرف هو جه منين أصلا .... بلا هم

في العصر الحديث عصر النهضة بعد عصور الظلام الأوروبية ابتدت أوروبا الناهضة بالعلم و الحضارة توسع نفوذها و تكسب أرض جديدة و تنوع مصادر ثرواتها و مصر كان ليها نصيب من الحملات الفرنسية و الأحتلال البريطاني ... ساهموا في الحقيقة في انفتاح مصر على العالم و أعادة اكتشافها .... و لكن للأسف هنا بدأت حركة الردة و العودة الى الخلف ... أصبح المصري بيطنطط بقديمه على مستحدث العالم المتحضر ... و يقولك مصر أرض الحضارة و الفراعنة كانوا نوابغ في كل حاجة تقريبا و الأوروبيين خدوا علومنا و طوروها .... الخ الخ الخ ..... طب قدمت أيه يا مصري للبشرية في عصر النهضة و الثورة الصناعية ؟ .... و لا حاجة ...

اللهم الا أفراد فرادى منفردين خرجوا الى العالم المتقدم و استغلوا جيناتهم الفذة فتفوقوا و أصبحوا من الأعلام في كل مكان في العالم .... طب ليه ؟
لسبب بسيط جداً .... أم الدنيا قضت حوالي 2700 سنة من تاريخها انتهوا سنة 1952 تحت الأحتلال .... أي نعم .... تحت الأحتلال .... تقريباً مفيش قوة ليها لازمة في العالم ما احتلتش مصر و بالتأكيد مش حباً في المصريين .... لكن لعبقرية المكان اللي بتتمتع بيها مصر قلب العالم .... لو مش مصدقيني افتحوا الأطلس .... كانت النتيجة أيه ؟ استغلال موارد مصر و عبقرية مكانها .... الأمعان في قهر أبنائها و عدم الأهتمام لا بتعليمهم و لا بصحتهم و لا الأعتراف بأن لهم كرامة من أصله ..... لذلك من السهل جداً تفهم لماذا عندما يخرج أي مصري ليتعلم أو يعمل في دولة تحترم الفرد و تعلي من شأنه و تعتبر كل فرد منفرداً ثروة يجب تنميتها و الأهتمام بها .... ينبغ المصري و يتفوق و يشار له بالبنان و في شتى المجالات .....

بالتأكيد أول تجربة لحكم مصري لمصر لم تكن وردية و لا أيجابية بالمطلق ... ممكن للبعض أن يعتبرها أسوأ من وقت الأحتلال ..... ما علينا لها ما لها و عليها ما عليها .... توضع في سياقها و تحلل بموضوعية و لابد من تفهم أن هذه التجربة أتت على يد العسكر و استمرت 60 سنة و العسكر لا يوجد بلد في العالم نجح أو ازدهر تحت حكمهم و محدش يقوللي الصين عشان الصينيين حياتهم زفت و بيتعاملوا على أنهم مكن و في كتير من الأوقات عبأ الدولة عايزة تخلص منه ....

الباحثين بقى عن مصر الجديدة و الحديثة و الناهضة محتاجين أيه علشان يلاقوا اللي ضايع منهم !! ...... أعتقد محتاجين تصالح مع النفس ..... تصالح مع الماضي ..... تصالح مع التاريخ اللي انكتب و خلصنا ....... ده لو عايزين يعملوا تاريخ جديد ينفع يتكتب يعني ! ...... لا أعني أبداً العفو أو عدم محاسبة من فسد و أفسد و ضيع مال و حال البلد ..... أهم شيء في العقوبة على الجرم مش معاقبة المجرم لأ ...... الأهم هو الردع ....... الردع عشان مايجيش حد جديد يقولك ما هو فلان بهدل الدنيا و نجا ........ العقاب مهم و أهم ما فيه الردع الناتج عنه ......

التصالح مع النفس يخلق حكمة في النظر للأمور بموضوعية .... و التصالح مع الماضي بكل أفراحه و أتراحه يخلق فهماً أفضل للشخصية المصرية ما مرت به و ما جعلها ما هي عليه الآن ...... يجعل تنميتها و التخلص من عيوبها ممكن .....

و أسوأ عيوب الشخصية المصرية حالياً هو أنها شخصية بلا أذنين مريضة بالتشبث بالرأي و لا تسمع ما دونه .... و أذا كان الخالق قد خلق الأنسان و له لسان واحد فقد منحه أذنين أثنتين في أشارة واضحة أنه يجب أن يسمع أكثر مما يتكلم و للسخرية أن الأذنين أقرب الى المخ الذي يحلل الأصوات و يترجمها الى معلومات .... أي نعم الأذنين أقرب الى المخ من اللسان ..... السمع يلزمه أذن سليمة و عصب سمعي سليم بينما الكلام يلزمه أشياء كثيرة أخرى بما فيها عضلات و أحبال صوتية و لعاب و ما يلزم .....

لا يوجد ملائكة و لا شياطين ..... فقط يوجد بشر ..... لا أسود ولا أبيض ..... فقط كل درجات الرمادي ...... لا توجد أشياء مطلقة سوى الموت و الحياة و كل ماعداهما نسبي .....

قليلاً من الهدوء ..... كثيراً من أدب الحوار ..... عظيمأ من ثقافة الأختلاف دون عداء ..... هو ما تحتاجه أم الدنيا مصر المُلهِمَة .....

بطلات الثقافة العربية

بآلي زمن عايزة أعمل بلوج لطيف كده أكلم فيه نفسي .... أكلم فيه الفضاء مش مهم .... حد هيقراه جايز .... طب هيعجب الناس ؟ مش مهم .... المهم أفك عن نفسي و أكتب اللخابيط اللي في دماغي ....

اللي حصل أني واجهتني مشكلة عويصة جداً ..... أسمٍي البلوج أيه ؟ ... تبنيت نظرية "و أخذ يفكر و يفكر ثم يفكر و برضه يفكر" .... و اكتشفت في الآخر حاجة لطيفة جداً ... أن مفيش أي بطلة في ثقافتنا المصرية في العصر الحديث ينفع آخدها مثل يعبر عنٍي .... و شوية بشوية نسيت موضوع الأسم الحركي بتاع البلوج و دماغي سرحت في كل بطلات الروايات اللي قريتها في حياتي و هم كُثُر و اكتشفت أني لو عايزة ألاقي حد يشبهني كان ممكن استعير اسم إيما من جين أوستن البطلة اللطيفة ذات النية الحسنة و الحكم الخاطيء دائما أو اليزابيث بينيت عدوة الأحكام المسبقة و أن كانت تقع فيها كثيراً أو ليلي بطلة ذا هاوس أوف ميرث لإديث وارتون الشخصية المتحررة الباحثة عن المحبًة الغير مزيفة و اللي دايماً ما بتثق في الناس الخطأ حتى انتهت نهاية حزينة كضحية لمجتمع منافق .... صراحة أي واحدة في دول تنفع ..... و غيرهم كتير ......

نيجي لثقافتنا العربية المصرية مالقيتش و لا واحدة .... مش عايزة أشبٍه نفسي لا بحتشبسوت و لا نفرتيتي و لا إيزيس و لا شجر الدر أنا عايزة حد يعبر عن البني آدماية المصرية العادية مش الملكة خاصة أن معندناش ملكات أصلاً حالياً و الحمد لله ....

مفيش .... سرحت أكتر في كل بطلات الروايات لقيتهم يا عيني اتمسح بكرامة اللي جابوهم الأرض حتى احسان عبد القدوس اللي نصر المرأة شوية برضه كل بطلاته فيهم العبر و عقد الدنيا و الآخرة ..... جت في بالي فؤادة بس فؤادة كانت رمز لمصر و أنا مش مصر أنا بس حتة صغننة من مصر ..... طب و بعدين ؟ رحت أدوًر و أفتكر صديق الطفولة يوسف السباعي لقيت بطلاته كلهم منشيين و لا يعبروا عن أي شخصية !!! طب معشوقي نجيب محفوظ ؟ .... لأ بلاش كل بطلاته حالتهم بلا برضه ..... الطيب أحسن

يا ترى ليه محدش كتب عن نص المجتمع بما ينصفه و بما يعبر عنه فعلا !! ليه كل بطلات الروايات العربي يا أما أمينة سي السيد يا أما جليلة العالمة !؟ ...... هو مفيش ستات و بنات في النص خالص كده !! .....

فعلا مجتمع ذكوري فذ خلاني لما أحب أدور عن وصف لنفسي يعبر عني بجد عن المصرية العادية مالقيتش غير أني أخد مؤنث الحرفوش و معرفش أصلا لغويا ده صح و لا غلط !!

ما علينا آدي حكاية حرفوشة .... أصلي في الحقيقة حرفوشة أصيلة ...... شوفينية و متحيزة و بأعاني و طلعان عين أهلي و معنديش أيُتْها فكرة قاعدة هنا ليه لسة لحد الوقتي !!!

في الوقت الحالي هاروح أظبًط شوية في البلوج ده لأني مُحْدَثَة و بعدين ربنا يسهٍل و الوحي ييجي تاني :)

يتبع .......