اللى يقول لكم أنتم حزب الكنبة و شِلَت ردوا عليه و قولوا له أنت جاهل لأنك ببساطة معندكش أى فكرة احنا اتعمل فينا ايه و شوفنا ايه و استحملنا ايه .... و كمان مره جاهل عشان بتعمم على 80-85 مليون بنى آدم جوة و برة مصر
أصلي قريت نوت لطيفة كده و عنوانها ملفت ... اللى كاتبها عاوز يقول للشعب المصرى اتنيٍل و سد بقك ... هو أنت لا منك و لا كفاية شرك !! و الا أنت صدقت صحيح حكاية حرية و ديمقراطية للجميع ؟؟؟ لأ و ايه أسلوب متعجرف و تِنِك و لا جمال مبارك فى زمانه
المهم .... ماسكة نفسى و كاتمة بقى و عمالة أقول اللهم طولٍك يا روح .... بس الصراحة و بعد الفوضى المزرية اللى وصلنالها فعلا مش قادرة أسكت ..... و خلاص بقى هقول اللى عاوزة أقوله و رزقى على الله ... كده كده هاتشتم و كده كده الأيام السودة بدأت و أخرتي فى سجن مؤبد من بتوع الأخوان اللى تحت الأنشاء الوقتي لو مالحقتش ألٍم عزالي أو أتنكر فى صورة زجاجة
أنا بس عاوزة أفك عن نفسى لحسن أطق ..... وهأوجه كلامى للأستاذ المحترم ديك البرابر و أول شىء لازم يذكر هو بيت للشاعر أبو الأسود الدؤلى بيقول فيه ......
لا تنهى عن فعل و تأتيَ مثلهُ ..... عارٌ عليكَ اذا فعلتَ عظيمُ
أنت مين عشان تعرًف و تصنًف شباب 25 يناير و اللى معاهم و اللى مش معاهم .... ما تسيب التاريخ هو اللى يقرر و الا ده احتكرته هو كمان ؟ عمري ماحسيت اننا محتاجين قانون ضد الأحتكار زي النهارده .... لأ و كمان محتاجين قانون ضد الأحتقار
مين وائل غنيم ؟ مش شغلك .... وائل غنيم شخصية غامضة ظهرت يوم 8 فبراير بالليل بعد ما كان المولد قرب ينفض فى عربية الدكتور حسام بدراوى .... اتنسب له ايه ! و هو ادعى ايه ! و نفى ايه ! مش مشكلة أبونا الوقتي ... الأيام هى اللى هتقول لنا مين هو وائل غنيم ... يستحق احترامنا و الا لأ .... زيه زى أى شخصية "عامة" بيختلف عليها الناس
أنت جاهل كمان مرة عشان ماتعرفش مين حسنين هيكل .... حسنين هيكل بتاع "البؤر" خلٍيه يحكيلنا و هو شاهد على العصر و أكبر مسلاتى فى العصر الحديث قضى عمره يمجد للديكتاتورية و حكم الفرد .... خليه يحكيلنا "الزعيم الخالد" جمال عبد الناصر عمل ايه فى الرئيس محمد نجيب ؟؟؟ و عمل ايه مع السنهورى باشا فقيه الفقهاء القانونيين و صاحب دستور 1954 ؟؟؟؟؟ و هو شخصياً "هيكل بيه" عمل ايه فى مظاهرات الطلبة 1971 اللى كانت لمطالبة السادات باتخاذ موقف و اعلان الحرب ؟؟ و طردهم ليه لما راحوله الأهرام اللى كان ماسكها فى الوقت ده و جابلهم البوليس ؟؟؟؟؟ و بما أنه أكبر عدو للفساد ممكن يحكيلنا شوية عن البيزنس بين ابنه "أحد الأغنياء فى العالم على قوائم فوربس" و بين هيرمس "و كلنا عارفين علاقة هيرمس بجمال مبارك" .... و الا ما يرضاش ؟
انت عبيط لو خلطت بين معرفة الناس لمسئولية مبارك عن 30 سنة هم و غم وبين الأصل الطيب اللى بيرفض التمثيل بأعدائه .... و بعدين مش انت راجل ديمقراطى !!!! لأ واضح فعلا انك راجل ديمقراطى ..... أوي صراحة
الأخوان .... و ما أدراك ما الأخوان ..... مش عايز الناس تخاف من الأخوان ؟ طب انت تعرف ايه عن الأخوان ؟ بيتهيألى لو تعرف أى حاجة عنهم و بتدعي لنفسك الدفاع عن الحرية كان زمانك مسروع منهم أكتر ما أنت مسروع من اسرائيل .... بتقول الفيصل الأنتخابات ! أنا معاك ... بس كمان ماتنساش انهم الفئة الوحيدة "تقريبا" حالياً اللى معاها فلوس زي الرز و تعرف كويس تجيٍش فى الأرياف زى ما الحزب الوطنى كان بيعمل تمام و مش هقول أكتر من كده
حَمٍل مبارك ذنب 30 سنة بس ماتحمٍلوش ذنب 60 سنة و ماتنساش ان الفساد و المعتقلات و مراكز القوى من قبله بكتير .... صحيح هو خربها و جابها أرض بس هو كمان مش جاى من هونولولو ... الفساد فى مصر من تحت لفوق و من فوق لتحت من قبل ما هو يحط رجله فيها و ده برضه ما ينفيش مسؤليته .... مش عايزين مبارك و لا أى حاجة من ريحة مبارك ... خلاص ارتحت !!!
و الغريبة يا أخي أن أعلى الأصوات و أسلط الألسنة هى للي كانوا أكثر المنتفعين من نظام مبارك و الحزب الوطني ... اللى اتعلموا بالكوسة و اتعينوا بالكوسة و اشتروا شاليهات فى مارينا برضه بالكوسة و غيره و غيره و تلاقى الواحد فيهم كل ما عام أكتر فى صلصة الكوسة كل ما عمل فيها عنتر و طَوٍل لسانه على الناس اللى كِفْرِت في عيشتها في عهد مبارك
الثورة المضادة .... شيء طبيعي انها تحصل ... أمال عايز البلاوي اللي كانوا موجودين يسيبوهالك كده بالساهل ؟ لو واثق من أسس ثورتك و الأسباب اللى أدت اليها و الناس اللى اتسحلت و ماتت و الناس اللى اتربالها الرعب ما تخافش أوي كده من الثورة المضادة .... بس و النبي بلاش النظرة الفوقية لعامة المصريين و بلاش أسلوب الجزيرة في احباط الناس و تدمير معنوياتهم .... مفيش مصري أهبل يا عم الحاج و بعدين بلاش رمي البلا على كل من هب و دب وكأن كل اللى كانوا موجودين فى مصر خلال ال60 سنة اللى فاتوا كلهم خونة و انت بس اللى طاهر و عمرك ما جبت واسطة من الحزب الوطنى .... و الا انت ماكنتش عايش في مصر أصلا !!!!
موضوع نخاف من اسرائيل ده مشككنى انك أصلا عندك أى فكرة عن ثقافة المصريين بعد 73 و موضوع الغاز ماتديهوش أكبر من حقه .... بيزنس .... صحيح بيزنس فاجر .... بس فى الآخر بيزنس و أهو كله قدام النائب العام و كتير ورا القضبان و لو شاطر قدم بلاغ و هات اللى عمل الصفقة دى و حاسبه ... انما محسسني ان المصريين كلهم عملاء لأسرائيل و انت بس اللى وطني !!!! يا خيٍ
ايران مش عدو ؟؟؟؟ انت جاى منين ؟؟ ايه !! معلوماتك كلها من الجزيرة ؟؟ يا راجل يا أمير ما تقرا التاريخ .... اقرا بس عشان أنا معنديش خُلق أقعد أفهٍم فى واحد كل معلوماته كومبو و تيك أواى
حلو أوى انك فاهم العلمانية بس أوعى تتخيل ان باقى المصريين حمير و مابيفهموش .... مش كل المصريين عايشين على الكوبى بيست ..... و بعدين ازاى حرية و عدالة اجتماعية و علمانية و بتمجد فى الأخوان ؟ انت عمرك ما دخلت نقابة فى مصر ؟؟؟ خدلك لفة فى النقابات المتأخونة و بعدين ابقى قوللى رأيك
المصريين اللى حاسين بالقلق على بلدهم وولادهم و مستقبلهم عندهم حق سواء عجبك أو ما عجبكش و الا خلاص نزعت عنهم كلهم الجنسية ؟ ... صعب جداً ان الناس تعيش فترة التاريخ فيها بيتكتب مع كل الرعب و الهلع و عدم الأستقرار و حكاية منصة الجمعة اللى فاتت .... و الا انت هتحجر على الناس تحس بأيه كمان بعد ما وصفتهم بانهم شِلَت !! و على فكرة برضه المصريين مش شِلَت و مش كل واحد مسكله يافطة نص ساعة ييجى يتنطط على "الشعب المصرى" لما هم ناس نكرة و مالهومش حق التعبير عن الرأي نزلت عملت ثورة عشانهم ليه ؟ و الا دي كانت عشان ناس تانيين أو حاجات احنا المصريين ما نفهمهاش ؟
عموما عملاً بمبدأ الشأن الداخلى .... خليك فى حالك و عبًر عن رأيك بأدب .... و بلاش أم النفخة بتاعة اللى جاب الديب من ديله و الا خد اللي كانوا معاك "أو اللي انت ماكنتش معاهم معرفش" و اعملوا لكم دولة بعيد عن المصريين الكُخٍين الوحشين اللى صدقوا انكم عايزين حرية و ديمقراطية لكل الناس مش ليكوا بس
و فى الآخر اياك تفكر انك تقدر تخدع كل الناس كل الوقت .... و اياك تفكر ان المصريين أغبياء أو مالهومش لسان ... و بجد هتخسر كتير لما تتعالى على شعب زي المصريين .... تبقى حلو و مؤدب نسمع لك و نتناقش معاك بس لمصلحة مصر .... تقول علينا شِلَت و حزب كنبة و تتعالى علينا و تتفرد و تِتٍني ..... نعرف نعرًفك مقامك و بالذوء مش بالعافية
الشعب اللى انت اتكلمت و ناديت و صرخت باسمه و جاى تِتًنٍك عليه الوقتى يعرف ازاي يخليك عمرك لا تتكلم باسمه و لا باسم أى حد تاني و طالما مش عاجبينك روح شوفلك شعب أنضف مننا أو انزل أقف فى التحرير و اهتف "أنا" أريد تغيير الشعب .... هنلاقيها منك و الا من القذافى !! ده أيه الغُلْب ده
مش عارف إنت كاتبه التدوينه دي رد على مين لكن لو كان شخص معين فكان ممكن تطلعي كل الكلام ده في تعليق على مدونته .. لكن مدام إنت إخترت إنك تكتبي تدوينه فيبقى الكلام عام .. و أنا الصراحه مشفتش من حد من اللي إشتركوا في الثورة أي نظرة فوقيه إلا من رحم ربي .. الناس اللي نزلت الشارع نزلت بمنتهى الأدب و أكثر من الأدب نزلوا بمنتهى الأمل .. الأمل في بلد بجد .. بلد ميحسوش بالإنتماء ليها عن طريق فيلم أو روايه و تنتهي حالة الوطنيه بكتابة كلمة النهايه في الفيلم أو بوصول القارئ للغلاف .. و كل مشاهد الوطنيه ترجع لعصور قديمه و أجيال كتير معرفتش يعني إيه كلمة وطن ... هو الوطنيه دي مفروض نعرفها في مادة التربيه الوطنيه ولا من بطولات روايات مصر للجيب ؟!! .. الوطنيه و الحب مشاعر متنفعش تكون من جانب واحد .. مينفعش إنسان إتعلم في مدرسه مبتعلمش و أبوه و أمه طول النهار و الليل مشغولين عنه علشان يوفروله بس لقمة العيش و لما يكبر يقولوله إنت تعليمك فاشل مينفعش تشتغل بالتعليم ده .. و لو إشتغل مرتبه ميقضيش إنه يعيش لوحده مابالك إنه مفروض يتجوز و يفتح بيت .. كل ده طبعاً سيدنا الوالي ملهوش فيه .. طيب و لو تعب .. أقولك أنا ... بما إن أنا طبيب .. مستشفيات مجاني آه موجوده .. دكاتره أيون .. تمريض أيون .. بس مفيش عمال عارفه ليه علشان مرتب العامل 90 جنيه .. و لو جابوا عمال لازم طبعاً يبقوا حراميه و إيديهم طويله على المرضى .. صفقه النظام كان عاملها مع الغلابه .. هسيبكوا تسرقوا بس اللي هينكشف هروقوا .. طبعاً ده فضلاً إن مفيش علاج ميمنعش حبايتين مسكن على كام أمبول ضد المغص لكن علاج بجد إنسي .. كل مشكلة الناس اللي نزلت في الشارع إنها في منهم اللي حسوا بالناس دي و بمعانتهم أو هما الناس دي و نزلوا يقولوا آه .. بس إزاي يقولوا آه هي سايبه .. يضربوا بالرصاص و يموتوا .. فيها إيه يعني .. ما إحنا صحينا في يوم لقينا ألف و شويه غرقانين .. هيبقوا أحسن من اللي غرقوا ... أنا عن نفسي كانت عندي معاناه من كل يوم الصبح أروح المستشفى أشوف طابور لا ينتهي من مرضى الفشل الكلوي اللي بيغسلوا .. كل غلطتهم إنهم شربوا من ماء من الحنفيه .. أيوه مايه بس مش معدنيه ولا من فلتر ... عايزاني محسش بدول إزاي؟!!! .. و ده طبعاً مش ذنب سيدنا الوالي هو هيعمل إيه ولا إيه؟!! مش كفايه الكباري ... و بعدين مالهم الإخوان .. نقيمهم على أساس إيه .. أنا نقابتي كانت إخوان .. ناس في مجلس جمد لمدة سنوات .. دول لو كانوا عباقره كانت قدرتهم قلت طول الفتره دي .. و مع ذلك كانوا بيتسجنوا كل شويه .. معترضين عليهم منديهمش أصواتنا .. لكن نقعد نقول الإخوان الإخوان كده و خلاص ... أياً كان من سيأتي مش هيكون أسواء من نظام مبارك اللي لسه مش عارفين نخلص منه .. سوري على الإطاله .. بس إعتبريني بفش خلقي شويه :))
ReplyDeleteأولاً شكراً يا دكتور أنك أخدت من وقتك عشان تقراها و أهلاً بيك في أي وقت ..
ReplyDeleteثانياً لو حضرتك لاحظت تاريخ كتابتها في مكتوبة في أواخر فبراير اللي فات كتعبير عن رأي يخصني زي ما فيه شخص أعلم هو مين وهو يعلم أنا مين أعطى لنفسه الحق أنه ينعت شعب كامل بالجهل والغباء والتغييب .. زي ما هو أدى لنفسه الحق ده فأيه المشكلة أني أدي لنفسي حق التعبير عن رأيي الشخصي .. اللي حابب يقراه أهلاً وسهلاً واللي مش حابب براحته ..
ثالثاً حضرتك بتوصف واقع مجتمع أعيشه كل يوم وفاهماه كويس ومقدرة آلامه وقهره أكيد أكتر من اللي تعالى عليه ووصفه بالكنبة .. وعلى فكرة عشان بس أنت افترضت شيء مش حقيقي خليني أصحح لك هنا .. أنا من هاتفي الشعب يريد أسقاط النظام لكن في نفس الوقت لو كان النظام هيسقط لحساب من يستعبد ويحتقر المصريين فللأسف هأقف ضده ..
أحتفظ بحقي في نقد من أشاء وقتما أشاء كما يفعل الجميع .. أحتفظ بحقي في المواطنة في بلدي بكل الحرية فلا ولاية ولا تبعية بين المصريين ..
أما بالنسبة للأخوان فرأي واضح ولن أبرره عذراً .. لك أن تقبله ولك أن ترفضه .. الشيء الوحيد الذي ليس لك هو أن تمنعني أن يكون لي رأي يخالف رأيك أو أن تفرض علي شيء في المطلق ..
لك حرية التعبير عن رأيك كيفما تشاء ولي نفس الحق .. النقاش بين الأنداد ممكن ولكن لا أقبل ولم ولن أقبل النقاش بلغة فوقية أو بفرض رأي من أي شخص كائناً من كان ...
تحياتي
يا فندم أنا مقلتش إن مش من حقك تعبري عن رأيك طبعاً ده حقك و محدش قال إن الوطنيه كانت بتتوزع في الميادين
ReplyDeleteأنا شاركت في الثورة .. و لحد دلوقتي بقول إن صديقي اللي كان نوباتجي في المستشفى يوم جمعة الغضب و حاول يسعف الناس على قد ما قدر و بعد ده كله رفض لبضغوط عليه لتغيير التقارير .. و لما طلبوا شهادته في النيابه راح أكتر من مره .. صديقي ده أنا شايفه أحسن مني
يعني ببساطه المشاركه في الثورة مش معيار خالص .. لكن في معايير تانيه .. في أمور قد أقبل فيها رأي الآخر مدام هو الآخر .. لكن ساعتها من حقي أنا أشوفه زي ما أنا عايز
يعني حد يقولي مثلاً الفريق أحمد شفيق .. هقوله أهلاً وسهلاً و براحتك بس إعرف إن الراجل ده كان في التلفيزيون بيقول هنوفرل للمتظاهرين الحمايه و أنا بتقتل .. أيوه أنا لأن اللي كان جنبي ده مكانش حد بعينه ده كان ببساطه أنا هو بس ربنا إختاره إنه يكون في مرمى الرصاص أو الحجر .. هو معملش حاجه أكتر من اللي عملتها .. هو كان ممكن يكون أنا بإنحراف مسار رصاصه أو حجر
القتل و الإصابات كانت في منتهى العشوائيه .. و عصابات البلطجيه اللي كانت محاصرة الميدان طوال الـ 18 يوم كانوا في منتهى التنظيم ..
وقفوني مره .. و لقيتهم ماسكين شاب من رقبته و نازلين ضرب فيه .. رحت ماسك الواد من إيديهم و ضاربه و قلتله آه يا إبن الأيه عايز تدخل للخونه .. و قلتله في ودنه إطلع إجري .. فرحوا بيا قوي و قالولي يا باشا إنت رايح فين تعالى هنوصل حضرتك .. و جه معايا بلطجي إسمه ماندو يوصلني لما قلتله أنا رايح الفرنساوي .. و ولاد ... قافلين الدنيا .. قالي يا باشا ولا يهمك بس هستأذن بس .. تصوري إستأذن من مين؟؟ .. ظابط لابس مدني في بوكس في شارع فرعي .. و مسلكتش منهم غير لما الظابط مسك في البلطجي علشان كان شايل عصايه من بتوع الأمن المركزي و حب ياخدها منه .. و البلطجي يرد عليه يقوله أختي الصغيره بتلعب بيها.
أنا شفت الكلام ده بعنيا .. مش بطلب منك إنك تحسي إحساسي ساعتها كان إيه بس على الأقل قدري مطالباتي بإني أعيش في بلد فيها الشرطه بتحميني من البلطجيه مش بتوقفهملي
أنا كنت هتمسك من أمن الدوله و اللي خرجني أمين شرطة كنت عامله عمليه .. ظهر إزاي و طلع إمتى مش عارف .. يمكن ربنا مكاتبليش الإعتقال .. بس من ساعتها و أي حد بيعتقل بحس إنه أنا
اللي عايز برجع النظام الفاسد هو حر .. من حقه و ده صوته و مقدرش أحجر عليه أبداً .. لكن صعب عليا قوي أحترمه ... و طبعاً الكلام ده مش ليكي خالص
إعتبريه فضفه .. أنا حتى مكتبتوش في مدونتي علشان محدش يقول إنت بتزايد في وقت بقى الكل بيزايد
ومين قالك اني مانزلتش التحرير !! ...
ReplyDeleteمع احترامي الجم وتقديري لكل كلامك وللمواقف الصعبة اللي بتتكلم عنها ... ده لا يعطيك الحق لا أنت ولا غيرك أنك تدي المصريين أوامر أو تكلمهم من فوق أو تقول أنا جاي أعلمكم الكرامة يا غجر ...
ببساطة أنت نزلت التحرير أكراماً لوطنك وغيرك قرر ماينزلش لنفس السبب أو أكتر ... لا أنت تمتلك الحقيقة كاملة ولا أنا ولا غيرنا ... كل واحد حر يفكر بالطريقة اللي شايفها صح ويحاول يخدم وطنه بالطريقة اللي تناسبه ... يا حرية للكل يا أما يبقى أحنا أسقطنا مبارك لصالح 1000 مبارك جداد ...
هنا أنا باناقش فلسفة التعالي واحتكار الوطنية والهتاف باسم شعب وهذا الشخص يحمل له في داخله كمية لا متناهية من الأحتقار والبغض ...
الشعب ماطلبش حد يهتف باسمه لكن نزل وساند باللي يقدر عليه وحمى أهل اللي كانوا في التحرير من شبابه فبالتالي مايكونش جزاءه يتقال عليه يا جاهل يا مغيب يا كنبة ...
لو بتقول أن المتعالين على المصريين قلة قليلة فالحقيقة ولا حتى القلة دي ممكن تكون مقبولة ولا يمكن تغفر اخطائها ....
ببساطة اللي مش عاجبه المصريين يروح يشوفله شعب تاني ومايبقاش تاني مرة يقول الشعب يريد أصل الشعب ما وكلهوش الحقيقة ...
للمرة الأخيرة كلامي هنا عن فلسفة فوقية وأشخاص متعالية على شعب هتفت باسمه في يوم فبالتالي العيب عندهم مش عند الشعب ...
ده رأي ومش هاغيره ورزقي على الله ....