بآلي زمن عايزة أعمل بلوج لطيف كده أكلم فيه نفسي .... أكلم فيه الفضاء مش مهم .... حد هيقراه جايز .... طب هيعجب الناس ؟ مش مهم .... المهم أفك عن نفسي و أكتب اللخابيط اللي في دماغي ....
اللي حصل أني واجهتني مشكلة عويصة جداً ..... أسمٍي البلوج أيه ؟ ... تبنيت نظرية "و أخذ يفكر و يفكر ثم يفكر و برضه يفكر" .... و اكتشفت في الآخر حاجة لطيفة جداً ... أن مفيش أي بطلة في ثقافتنا المصرية في العصر الحديث ينفع آخدها مثل يعبر عنٍي .... و شوية بشوية نسيت موضوع الأسم الحركي بتاع البلوج و دماغي سرحت في كل بطلات الروايات اللي قريتها في حياتي و هم كُثُر و اكتشفت أني لو عايزة ألاقي حد يشبهني كان ممكن استعير اسم إيما من جين أوستن البطلة اللطيفة ذات النية الحسنة و الحكم الخاطيء دائما أو اليزابيث بينيت عدوة الأحكام المسبقة و أن كانت تقع فيها كثيراً أو ليلي بطلة ذا هاوس أوف ميرث لإديث وارتون الشخصية المتحررة الباحثة عن المحبًة الغير مزيفة و اللي دايماً ما بتثق في الناس الخطأ حتى انتهت نهاية حزينة كضحية لمجتمع منافق .... صراحة أي واحدة في دول تنفع ..... و غيرهم كتير ......
نيجي لثقافتنا العربية المصرية مالقيتش و لا واحدة .... مش عايزة أشبٍه نفسي لا بحتشبسوت و لا نفرتيتي و لا إيزيس و لا شجر الدر أنا عايزة حد يعبر عن البني آدماية المصرية العادية مش الملكة خاصة أن معندناش ملكات أصلاً حالياً و الحمد لله ....
مفيش .... سرحت أكتر في كل بطلات الروايات لقيتهم يا عيني اتمسح بكرامة اللي جابوهم الأرض حتى احسان عبد القدوس اللي نصر المرأة شوية برضه كل بطلاته فيهم العبر و عقد الدنيا و الآخرة ..... جت في بالي فؤادة بس فؤادة كانت رمز لمصر و أنا مش مصر أنا بس حتة صغننة من مصر ..... طب و بعدين ؟ رحت أدوًر و أفتكر صديق الطفولة يوسف السباعي لقيت بطلاته كلهم منشيين و لا يعبروا عن أي شخصية !!! طب معشوقي نجيب محفوظ ؟ .... لأ بلاش كل بطلاته حالتهم بلا برضه ..... الطيب أحسن
يا ترى ليه محدش كتب عن نص المجتمع بما ينصفه و بما يعبر عنه فعلا !! ليه كل بطلات الروايات العربي يا أما أمينة سي السيد يا أما جليلة العالمة !؟ ...... هو مفيش ستات و بنات في النص خالص كده !! .....
فعلا مجتمع ذكوري فذ خلاني لما أحب أدور عن وصف لنفسي يعبر عني بجد عن المصرية العادية مالقيتش غير أني أخد مؤنث الحرفوش و معرفش أصلا لغويا ده صح و لا غلط !!
ما علينا آدي حكاية حرفوشة .... أصلي في الحقيقة حرفوشة أصيلة ...... شوفينية و متحيزة و بأعاني و طلعان عين أهلي و معنديش أيُتْها فكرة قاعدة هنا ليه لسة لحد الوقتي !!!
في الوقت الحالي هاروح أظبًط شوية في البلوج ده لأني مُحْدَثَة و بعدين ربنا يسهٍل و الوحي ييجي تاني :)
يتبع .......
i like :)
ReplyDeleteحرفوشة..شوفونية..علمانية..مهما تكونى حندور على كتاباتك الثرية فى كل مكان ولاحظى ان تأثيرك علينا كان وسيظل بأذن الله منارةثقافية ووطنية للكثير من المصريين اللى بيفهموا ويشاركونك افكارك..مبروك يا منى والى الأمام
ReplyDeleteرائعه المصمون وبسيطه وغير متكلفه فقط بس كيف تبدأي القطعه و
ReplyDeleteفقط موضوع المجتمع الذكوري... انا رايي ان الست ( ودي كلمه فرعونيه مازلت حتى الان لتعبر عن قوة الشخصيه للمراه المصريه) منذ فتره ليست بالقصيره وهي تدير شئون بيتها من الالف للياء وا90% منهم لا يسمحو للرجل باي تدخل
اما لو تقصدي انه مجتمع ذكوري من ناحية الحريات وما يعطيه للمرأه يقل كثيرا عما يعطيه للمرأه..فبكل تاكيد معاكي حق بس دا راجع لعادات وتقاليد محرفه لتعاليم الاديان..بس عموما دلوقتي مفيش حاجه المراه لاتستطيع عملها فحاليا لها كل الحريات في رأيي.
ومبروك (متأخره 3 سهور معلهش) على البلوج
بس سؤال خبيث معلهش ( انا يغلب عليا التحليل النفسي بحكم عملي ) .. ليه بعد السنين دي كلها ظهرت موضوع الكتابه عندك، هل دا عائد للثوره ورد قعلك من اللي بيحصل؟:)) ... بلاش ظرظره ، ماشي
:)
بكل تأكيد هو مجتمع ذكوري يفسر الأديان والحقوق والواجبات من وجهة نظر ذكورية بحتة .. حتى في لغة الهزل أو "الهزار" ستجد معظم النكات والقفشات تحقر من الأنوثة وكل ما هو أنثوي .. عموماً هي ثقافة موجودة ومستشرية الا فيما ندر ويجب التعامل معها والتصدي لها من وجهة نظري .. أما بالنسبة لموضوع الكتابة فهو قديم ولكن أنشاء البلوج تأخر كثيراً لقلة وقت الفراغ .. وعموماً أنا أكتب لنفسي كهاوية ولا أعتقد أني سأحترفها لا عاجلاً ولا آجلا :)
ReplyDeleteشكراً للتعليق وأتمنى أن تحظى كتاباتي المتواضعة باستحسانك دائماً :)
أهلا منى
ReplyDeleteبعد التأمل في هذا النص الجميل و المملوء بالمراوغات الفكرية العقائدية و التي تغيب المرءة المصرية الحقيقية كما ترينها أنت في الواقع المعيش و ما وصفها أو بالأحرى ما صورها بها الكتاب و المؤلفين في جل الأفلام و المسلسلات المصرية أو حتى الغير مصرية و هذا في إعتقادي ليس بالضروري تصور رجالي فقط بل حتى النساء المصريات الذين أخرجنا أو أنتجنا أفلام مصرية أعطوا نفس الصورة و نفس الهيكلة للست المصرية، و حسب رئي المتواضع المؤلفون و المنتجون على إختلاف أديانهم و إنتماآتهم لا يفكرون في المرءة بالوضع الحقيقي الذي نعيشه بل يجب عليهم إيجاد صورة أو تصور يستهلك بسهولة أو يباع و مربح فهي في الأصل عملية تجارية حتى ولو في بعض الأحيان نتصورها ثقافية و تأكيد لكلامي فإن جل أبطال الأفلام ذات شهرة هم رجال غير عاديين هم رجال كما نتمنى أن نكون سواء من الناحية الجسمانية: قوة و رجولة أو من الناحية العاطفية الخارقة للعادة و التي نتمنى في يوم من الأيام عيش و لو لحضات منها....،
Nagui
جميلة يا منى انا كتير كنت بسأل السؤال دا بس لا قيت الاجابة ان الطلع المجتمع الذكورى هى المرأه الذكوريه الخاضعة والأسخدمت القهر فى قهر بنى جنسها لاحظى مدى الغيره والحقد لما تلاقى ست ناجحة وسط مجتمع السيدات احنا العملنا فى نفسينا كدا مجرد رأى وأملى انى الاقى كتبات تعبر عنى كأنثى شرقيه لان فى كتبات الانثى الغربيه هى تخطت الكثر من الاحنا مازلنا بنعانى منة
ReplyDeleteده اساس التدوين ، تكلمني نفسك ، اما الاسم بقي ، فكل واحد يختار حاجه تريحه ، اسم صفه اغنيه شتيمه ، حسب ماخياله ووجدانه يبعته !!! حلو اسم حرفوشه ، لان كسر احتكار الرجال لفكره الحرفشه !!! كلنا حرافيش ، الرجل حرفوش والست حرفوشه ومحدش احسن من حد !!!ا
ReplyDelete