مسئولية الصوت الإنتخابي

أنا نزلت استفتاء مارس وكنت من الأقلية اللي رفضت التعديلات .. وانتخابات البرلمان مرحلتين والشورى مرحلة واحدة لأن التانية كانت بين اخوان وسلفيين ونزلت الرئاسة مرتين وقاطعت دستور أم ترتر ونزلت استفتاء يناير وكنت من ال ١٪ اللي رفضوا الدستور 

الخلاصة .. صوتك ملكك ليس لكائن من كان إنه يقولك تعمل بيه إيه .. تقدر تقاطع وتقدر تبطل وتقدر تختار وتنتخب حتى لو هتندم على اختيارك بعد كده 

خد في اعتبارك الظرف السياسي اللي بتمر بيه البلد وان النزول للانتخاب ليس فقط لإختيار رئيس ربما تظن انت أو غيرك ان اختياره محسوم ولكن نزولك هو إضفاء شرعية على النظام السياسي القائم بتلبية دعوته للإنتخاب .. وللنظام السياسي الجديد اللي هيتكون .. وكمان رسالة للعالم بإن الجبهة الداخلية المصرية قوية متماسكة لأن بلدك في حالة حرب وحرب شرسة كمان 

لو لقيت واحد من المرشحين انت راضي عن أيديولوچيته ومشروعه بنسبة تتعدى ال ٦٠٪ من فضلك إديله صوتك .. سياسياً دي نسبة قبول معقولة ومفيش حد هيلاقي رئيس نسخة مستنسخة منه .. وخد بالك انت بتقيم بناءً على ما هو واقع النهارده ولا تعلم الظروف ممكن تتغير ازاي بعدين فإختار القادر على مواجهة التحديات المستقبلية في تقييمك ومن وجهة نظرك  

اللي بيقولك لو مانزلتش تنتخب مالكش حقوق بعد كده كداب .. حقوقك السياسية بتتمتع بيها طول ما القانون بيسمحلك سواء مارستها أو لأ .. لكن في الحقيقة ده هيكون سوء تقدير منك في الظرف الراهن وبرضه محدش من حقه يزايد عليك ولا يعدل عليك .. انت وحدك صاحب الإختيار والقرار حتى لو قررت تتنازل عن حقك في الإختيار 

كل ما أرجوه من أي حد بيقرا كلامي ده إنه يفكر ويقرر بموضوعية وبحس وطني وبعيداً عن العواطف .. هو في الأول والآخر قرار شخصي للغاية ويعبر عن صاحبه وصاحبه فقط .. فكروا بروية وخدوا قراركم من دماغكم بكامل إرادتكم وتوكلوا على الله ونفذوه 

ربنا يتم الإنتخابات على خير وينجينا وينجي بلدنا من مصائر بلاد تانية ومما كان مخطط لنا .. بالتوفيق للجميع