صوتي مش مضمون مقدماً يا ريس

تاني عشان اللي مسمعش يسمع .. الدولة المصرية هتحرم الإخوان ومطاياهم اليسارجية من الإنجاز الوحيد اللي عملوه في حياتهم "وعملوه بمزاج العميقة برضه" ألا وهو مجيدة محاولة قلب نظام الحكم الناجحة في يناير 2011 

الدولة المصرية هتتبنى مجيدة وتاخد منها شرعية سياسية دولية وده حقها الصراحة لأن الإخوان ومطاياهم لم يكونوا لينجحوا في قلب نظام الحكم لولا سماح الدولة المصرية وعلى رأسها مبارك 

الدولة المصرية بتنشيء نظام سياسي جديد وأي نظام سياسي يحتاج 3 شرعيات .. داخلية .. دولية .. وفي المنطقة دي تلزمه شرعية دينية كمان 

- الشرعية السياسية الداخلية هتاخدها من الانتخابات "والتطبيل اللي بنطبله للدولة وللجيش وللسيسي وعيشوا بغيظكم" واللي معترض يطأ يموت مفيش مشكلة 

- الشرعية الدينية وهي لازمة لا يمكن إنكارها في المنطقة والإقليم قصرها السيسي على الأزهر والكنيسة القبطية  

- الشرعية الدولية لازم تتاخد بمجيدة اللي تاني لم تكن لتتم لولا سماح الدولة المصرية وعلى رأسها حينذاك مبارك .. الشرعية الدولية تلزمها مجيدة المعترف بها دولياً واللي تم التهليل ليها من أصحاب المؤامرة ومينفعش تتاخد من 30 يونيو لأن المجتمع الدولي شايفها إنقلاب برغم إن مجيدة برضه تعريفها إنقلاب بس المجتمع الدولي صاحب غرض والغرض مرض 

خليكو فاكرين إن دي مش أول مرة الدولة المصرية تعملها .. أنور السادات دفن دولة يوليو مع عبد الناصر في سبتمبر 70 وفضل يحتفل بيها ويمجدها عشان ياخد منها شرعية دولية لأن يوليو كان معترف بيها دولياً .. في حين على الأرض السادات كان بيبني المؤسسات اللي هدمها ناصر بمعول يوليو وفي كل لحظة السادات كان بيدوس بالجزمة على قيم يوليو وهو بيحييها ويحتفل بيها ويمجدها كل سنة

طيب .. أنا فاهمة ده ليه بأة مش موافقة السيسي في كلامه عن يناير المجيدة وممكن أحرمه من صوتي في الانتخابات لو بان منه على الأرض أي تحيز ليها ! 

عشان أنا مش مسامحة ولا هسامح اللي تآمروا على بلدي في يناير المجيدة لحد آخر نفس .. وعشان أنا مواطن حر مش وظيفته يسمع كلام الدولة وينفذ الأوامر بما يخالف ضميره وقناعاته .. وعشان أنا كمواطن من حقي أضغط على الدولة عشان مصالحي .. وعشان أنا مواطن وقف مع بلده في أحلك الظروف واستحمل التصنيف والوصم والتجريس والإهانة وحارب الإرهاب الفكري وبلطجة الرأي ولم يخضع أو يصمت أو يخاف .. ولا أستحق أبداً بسبب إنتمائي للوطن إن صوتي يتاخد فور جرانتيد يعني مينفعش السيسي يلوي دراعي بحبي لبلدي وخوفي على مصلحتها 

أي نعم أنا مش كمالة عدد وصوتي مش مضمون مقدماً يا ريس