- جوجل اسم أي شخصية من شخصيات ديزني أو مابيت شو هيطلعلك تاريخ اللي أدوا صوتها واللي حركوها واللي عملوا سكريبتات برامجها وأفلامها .. ليه صناع شخصية النجمة فاهيتا مجهولين ؟ ليه مش عايزين يستمتعوا بنجاحهم ويشرحوا لجمهورهم الكونفليكت بتاع إعلان ڤودافون ! للدرجة دي بيحتقروا جمهورهم ؟
- النجمة فاهيتا متابعينها من النخبة والنجوم كتير ومستضيفينها وملمعينها كتير .. معقول كل دول ميعرفوش من صانع فاهيتا ؟
- عمرك شفت فيلم أنيمشن من غير تتر فيه أسماء الأرتيستس المشتركين في العمل سواء ممثلين بيأدوا الأصوات أو كتاب سيناريو أو مخرج أو حتى اللي بيخيطوا هدوم العرايس أو بيرسموها !! إيه هي فاهيتا عندها سر حربي ؟!
- بعيداً عن روبرت لانجدون وشفرات وأكواد داڤينشي إعلانات فاهيتا السيريالية اللي شوية بتسخر من القنابل واحنا شعب بيواجه إرهاب وشوية فيها سابليمينال ماسيچز لا يخطئها أي واحد بيفهم في الميديا إيه حكايتها ؟! الماركيتيرز اللي بيقبلوا عرض الإعلانات دي بيصرفوا فلوس شركاتهم على إعلانات بلا رسائل واضحة ليه !؟
- محاولات الفصل بين الدمية وبين صانعها ومحركها الفجة والتريقة على النيابة اللي هتحقق مع عروسة قطن المقصود منها إيه ؟! بتداروا على إيه !؟ بترهبوا فكرياً كل واحد بيسأل أسئلة بيزيك مشروعة ليه ؟!
- إزاي مذيع محترم في فضائية كبيرة يسمح لنفسه إنه يعمل إنترڤيو مع شخص مجهول بيتكلم من ورا دمية وميقولش لجمهوره هو بيتكلم مع مين ؟! إيه احتقار الجمهور ده ! وبعدين تجيله الجرأة يدافع ويقول دي شركة بتحسن صورة مصر في الخارج وفيها مسيحيين ! ما هذا العبث وتضليل الناس واقتيادهم إلى حواري وأزقة جانبية !
- الإعلام الغربي دخل على خط الهيستيريا ليه ؟! وهو يعلم سوابق كتير لمشاكل وإتهامات لشخصيات كرتونية ففين مجال السخرية من المصريين هنا وليه ؟
- الناس اللي بتدافع بعنف وشراسة بتدافع عن إيه ؟ عن صانع الشخصية المجهول ولا عن تدني جودة المنتج ولا ممنوع حد يفتح بقه في مصر أصلاً ويحاول يفهم أي ظاهرة جديدة أو غريبة ؟!
- مش بتهم حد بجاسوسية وإن كان الإحتمال مش مستحيل لكن بس عايزة أفهم الأڤورة دي كلها ليه ؟! عشان النيابة قررت تحقق في بلاغ الإحتمال الأكبر إنها هتحفظه ولا عشان فيه ناس شايفة نفسها فوق القانون ولا عشان إيه !؟
ممكن حد يفهمنا لو سمحتم !
No comments:
Post a Comment