ثورة قوالب الطوب

البعض بيقول إذا كنت بتعتبر يناير خيانة يبأة فيه حاجة غلط ! هو الحقيقة ومن وجهة النظر التانية إذا انت لسة مش فاهم يناير يبأة انت اللي عندك حاجة غلط  .. 

صحيح لولا يناير ما كانت يونيو بس ده زي لولا ٦٧ ما كانت ٧٣ يعني برضه في كل الأحوال محدش كان يتمنى ٦٧ تحصل ولا يناير تحصل .. والموضوع على فكرة مالوش أي علاقة بمبارك وفسادة وتخليله في البرطمان في آخر عشر سنين ولا له علاقة بالرغبة في التغيير من عدمه 

ببساطة ممكن تكون قرفان ومتأثر على صعيد شخصي من الفساد وعايز مبارك يمشي من ٢٠٠٣ مثلاً ومش راضي عن حاجات كتير في البلد وراغب جداً في التغيير بس برضه شايف يناير خيانة ومحاولة ناجحة للاخوان لقلب نظام الحكم بغطاء علماني هش مدفوع الأجر وانقلاب على النظام الجمهوري المصري ومؤامرة لتركيع مصر وهدم أعمدة الدولة .. آه والله ممكن أكون مش عايز الحزب الوطني ومبارك وعانيت منهم في حياتي على صعيد شخصي بس رافض هدم بلدي .. لكن نعمل إيه في اسطمبات الينايرجية اللي بتفكرني بچورچ بوش ومن ليس معنا فهو ضدنا !!

مش قادرين يفهموا إن مفيش اسطمبة أفكار وآراء وبيدعوا تحررية الفكر .. مش عايزين رأي غير رأيهم وبيرفعوا شعارات الحرية .. يا جماعة انتو عندكم مشكلة فعلاً وواضح إنكم كنتم عايزين تشتغلوا في مصانع تعليب خضار وسمك أو قماين طوب .. هيفضل فيه رأي .. لأ هيفضل فيه آراء غير رأيكم .. وهيفضل فيه ناس راغبة في الحداثة والتحرر والتقدم والقضاء على الفساد ومش بتأله مبارك ومش عايزة رؤوس الحزب الوطني بس برضه شايفة يناير خيانة ومؤامرة لهدم البلد شارك فيها ناس عن علم وناس عن غفلة وبسلامة نية 

ليه أفقكم ضيق كده ؟ حاولوا تتفهموا الرأي المختلف وأسبابه بدل التريقة والشتيمة اللي بينموا عن جهل عظيم وفاشية مسيطرة على عقولكم .. انتم مش لوحدكم في البلد رسالة وصلها لكم ١٢ مليون مصري بلس في الانتخابات اللي فاتت افهموها عشان تقدروا تكونوا أد الشعارات اللي بتقولوها .. وبعدين يا سيدي ولا يا ستي شوف اللي انت عايز تشوفه وسيب الناس تحكم وتشوف براحتها مالك ومال الناس بتفكر ازاي ؟ عايزين كمان تتحكموا في أفكار وآراء الناس وتقولولي حرية !!